Administrative & Political Policy

POLITICAL AND ADMINISTRATIVE POLICY
(Ram leh hnam kaihhruai leh rorelna tha siam)

MNF Party Political Policy te hi Politics a kan thiltum hlawm lian tak tak infinkhawm atanga duan a ni a. Chungte chuan ram leh hnam enkawl leh venhim te, ramri humhalh te, rorelna dik leh langtlang sorkar siam te, vantlang nun tha leh kan sakhua vawnhim te, Mizorama chengte inpumkhatna leh lungrualna chungchang te, zohnahthlak unau hnam hrang hrang, kan chhehvel rama awmte inunauna leh rorelna hmunkhata kan awm theih dan tur ruahmanna te Culture, Arts leh Literature lama inpawlna tha zawk neih theihna a tan a tul anga Seminar, Workshop etc. te ruahman a ni. Tin, chimrala kan awm tur ven te, MNF leh India Sorkar ‘Inremna’ (Memorandum of Settlement) vawngnung zel tura hmalak te, hmasawnna ruhrel tluantling siam te, leilung hausakna leh malsawmna haichhuak a Mizoram hi ‘Zoram thar’ ni tura buatsaih te, Mizo mipuite hmasawnna kawng dika hruaia hmalam pan tura buatsaih te he Policy hian a huam a ni.

Ram leh Hnam kaihhruai dan tur (Political Policy & Programmes)

Mizoram hi Pathian min pek a ni tih hre rengin, a ramri venhim, ram tih hmasawn leh Mizo hnahthlak zawng zawngte inzawmkhawm a, Mizoram leh a chhehvel a zo hnahthlak cheng zawng zawngte rorelna pakhat hnuaia awmtir hi MNF Party thil tum a ni. Tin, Mizo hnam nunphung (culture), sakhua leh tawngte humhim a chawisan zel hi MNF party thupui pakhat ani a, chumi atan chuan Innerline Regulation leh Mizoram venhimna dan dinglai dang reng rengte hi khauh taka ken kawh hi kan tum a ni.

Tin, MNF Party hi Mizo nationalism kengkawh tu party a nih angin, Ram leh hnam himna atan leh chimrala kan awmlohna turin, hnam rilru nghet ‘Mizo Nationalism’ hi MNF Party chuan vawn nun zel a tum a, chutih rualin Mizoram mi dik tak, hnam tlem zawk (minority) te venhim leh an dinhmun chawikan bakah Mizoram a cheng mipuite inngeih tak leh hlim tlang taka chen ho hi MNF Party duh dan a ni.

Heng a chunga Policy tarlan tak zul zuia hma lak dan tur leh ruahmanna (programmes) te a hnuaia mi ang hian duan a ni.

Mizoram ramri buai chinfel leh venhim

Mizoram hian thenawm state te nen ramri buai kan nei fova, tualthahna leh inrikrapnate a thleng fo thin. Hemi chingfel turin theihtawpin hmalak tum a ni ang a, heng kan buai neihpui te nen hian Politics dawhkan kilpui tur leh a tir atanga kan ramchin vawnghim tura theihtawp chhuaha hmalak tum a ni ang. MNF Party chuan Mizoram State Boundary atan Bengal Eastern Frontier (BEF) Regulation 1873 hi kan pawm.

A-1.2 Mizoram leh a chhunga chengte ven him:
Mizo te himna atan Mizoram hmun thenkhat Scheduled Area a dah let tur leh Mizoram Tribe list siam tha turin hma lak a ni ang. Tin, Mizo tawng hi Indian Constitution (8th Schedule) a telh tura MNF sorkar in hma alo lak tawhna te chhunzawm zel a ni ang. Mizoram himna atana Inner-line Regulation te, Restricted Area Permit te keng kawh in, dan lova lut te dap chhuah hna thawh zel a ni ang. Mizote chim rala kan awm loh nan Mizoram a sumdawnna dan (trading regulation) pawh a tul anga ennawn in mizote tana him thei ang ber tura siam that a ni ang. Mizo hming hawh a hnam dang sumdawng te dapchhuak zel turin nasa zawka hmalak a ni ang.

A-1.3 MNF leh India sorkar inremna tihlawhtling tura hmalak:
MNF leh India sorkar inremna thuthlunga tih puitlin loh la awm zawng zawngte tipuitling turin hma lak chhunzawm zel a ni ang. Tin, Mizo hnam tana mahni in leh lo chhuahsana lo rammu tawh te leh ram tana nun pe (Martar) chhungte leh Mizo hnam Movement avanga kawng hrang hranga lo tuar tawhte chhawmdawlna tha zawk ngahituah sak an ni ang.

A-1.4 Zofate inpumkhatna tur a hmalak
Mizo te luah chin ram zawng zawng rorelna pakhat hnuaia awmtir turin hma lak zel a ni ang a, Mizo hnahthlak zawng zawngte in-u-nauna tha zawk a awm theih nan thenawm ram a cheng zofate nena intawh khawmna (cultural meet) buatsaih tan a ni ang. Tin, zohnahthlak hmun hrang hranga awmte inpumkhatna tha zawk a awm theihna atan a tul anga ‘goodwill ambassador’ te tir chhuakin khawvel huapa zofate intawhkhawmna (International Mizo Convention) te ram hrang hrangah buatsaih tum a ni ang.|hang leh tharte zinga ram leh hnam hmangaihna thinlung leh mizo tlawmngaihna thinlung tuh thar leh tura hmalak a ni ang.

A-1.5 Zoram hmasawnna rualkhai zawka kalpui:
Mizoram a hnam chi hrang hrangte lungawi tlang taka kan chen za theih nan chhim leh hmar, chhak leh thlangah hmasawnna (Development) rualkhai thei ang bera kalpui hi MNF Party chuan a tum a ni.

A-1.6 Thlahtute chhui leh an sulhnu humhalh:
Hnam ropuina thuruk hi hmasawnna leh changkanna kawng chauhva teh a ni ngai lova. Hnam rohlu leh thlahtute sulhnu ngaihsan leh vawnthatah te a inghat thuk em em a ni. Hei hian hnam ngelnghehna thui tak a keng tlat a ni. MNF Party chuan min thlahtute chanchin hriat leh an sulhnu te vawnhim hna hi a ngai pawimawh tak zet a. Heng lama hma kan sawn theih nan zirbingna (research) lam pawh uar zawka kalpui tum a ni.

A-1.7 Ram leh hnam chhiat thata mawhphurhna:
Kan ram hian hma a sawn theih nan mitin ten a chhiat a thatah mawh kan phur nasa em em a. He mawhphurhna kan neih hrechiang tura hmalakna (movement) nei a, helama tanlakna nasa tak neih tum a ni. Hei hian thangtharte leh chhuan lo awm zel turte tan hnam veina rilru a pe nasa em em dawn a ni. Mizoram hi a chhiat a thatah mitin ten mawh kan phurh zia hi nasa taka inzirtir tum a ni.

A-1.8 International Politics / Border Trade a hmalakna: Mizoram hi India hmarchhak ramri depa awm kan nih angin, Myanmar leh Bangladesh te nen inthenawm ram kan ni a. Hei hian kan Politics kawng tam takin a nghawng a; heng kan thenawm ramte nen hian inremna tha tak siam leh venhim a ngaih thulha venghim tur te, India Sorkar aiawh a tul pawh a aiawh thei tura tan lak tum a ni. Tin, he kan awmna hmun remchang (ideal Geographical location) hian sumdawnna hmun tha leh kawng hrang hranga tan lakna remchang min siamsak nasat avangin, hei hi nasa taka hman tangkai tum a ni. Central Sorkar ‘Act East Policy’ nen tangkawpin, khawmual leh tuipuia inkalpawhna tha leh sumdawnna hmunpui te siam tum a ni.

A-2 Sorkar inawpna leh rorelna kalpui dan tur
(Administrative Policy & Programmes)
Rorelna tha leh dik ‘GOOD GOVERNANCE’ hi ram hmasawnna tura thil pawimawh ber a nih avangin MNF party chuan Sorkar rintlak leh a ngaihna hria (effective and efficient), dan leh hrai (rule of law) ngai pawimawh, langtlang (transparent), mitin huapzo (equitable), mi zawng zawng lenna (participatory), inrawnkhawmna atanga lungrual taka thil tih hona (concensus oriented), ram chhiat leh thata mawhphurhna la ngam sorkar (accountable), mipui mamawh rang taka phuhru thei (responsive) din kan tum a ni. Sorkar inrelbawlna (administration) tha leh chak zawk atan tunlai thiam na (Information & Communication Technology) nasa zawka hman tangkai tum a ni. He Administrative Policy ti hlawhtling tur hian a hnuaia mi ang hian hmalak a ni ang.

A-2.1 Inthlanna felfai leh dik:
Election Commission of India in inthlan dan mumal leh tha tak a buatsaih chung pawhin kan ram inthlan dan hi duh angin a thianghlim thin lo niin a lang. MNF party chuan inthlanna thianghlim leh fel a awm theih nana tlawmngai pawl (NGO) hrang hrangte tan lakna hi tha a tiin a thlawp a, an ni nena thawk hoin inthlanna felfai leh thianghlim a awm theih nan theihtawp a chhuah ang. EVM aiah Ballot Paper hman hi a felfai zawk kan ti.

A-2.2 Thuneihna semzai (Decentralization of Powers and functions):
State sorkar in thuneihna a pumbilh lutuk hi hmasawnna tibahlahtu pakhat a nih avangin hmasawnna rualkhai zawka a kal theih nan sorkar dan dinglai (constitutional provivision) ngai pawimawhin thuneihna leh hna semzai (power decentralization and out-sourcing policy) hi MNF Party chuan kalpui a tum a ni. Mipui te that tlan zawk nan thuneihna semzai turin kawng hrang hrangin hmalak a ni ang. Village Council leh Local Council te hnathawh dan leh an thuneihna te hi kan ram tan a beitham ta lutuk a, chuvangin India Constitution Article 243 leh 11th and 12th Schedule zulzuiin V/C leh Local Council te hnenah thuneihna sang zawk leh hamthatna tam zawk siam sak an ni ang. Khawpui te deuh (Sub-town) a VC dan pawh siamthat a ni ang a, tun aia rorelna tha leh felfai a neih theih nan thuneihna sang zawk pek an ni ang, V.C leh L.C. te hnathawh dan leh sum dinhmun te mipui te hnena puan zar thin a ni ang. Heng atan hian Panchayati Raj dan her rem a, a remchan dan anga hman a ni ang. (Appendix-I & VIII ah a detail dah a ni).
Tin, hmasawnna kawng hrang hranga hmalaknaah tlawmngaipawl (NGO) te hman tangkai leh an hnathawhna tur sum mamawhte ngaihtuahsak leh budget-a dahsak tum a ni ang.

A-2.3 District hrang hrang leh ADC tih hmasawnna:
District Administration zawng zawng siam that a ni ang a, Autonomous District Council awm lohna hmunah District Development Council dinin District Headquaters-ah te Municipal Council / Board din turin hmalak a ni ang. Autonomous District Council (ADC) te hamthatna leh hmasawnna ngaih pawimawh a ni ang a, Central Fund tam zawk haichhuah a ADC te tana tangkai zawka hman tum a ni.

A-2.4 Sorkar inrelbawlna (Administration) siam that

A-2.4(i) Administrative Reform Commission:
Mizoram sawrkar inrelbawl dan leh kalphung (Administrative system) fel lo siam tha turin Administrative Reform Commission dinin kalphung tha zawk hman tum a ni ang. Chuvangin sorkar hnathawk ten mipui chunga roreltu ni lova mipuite rawngbawl saktu (Public Servant) an nih ang ngeia hna thawh tir hi MNF Party chuan a tum a ni.

A-2.4(ii) e-Governance:
Sorkar inrelbawlna tha leh chak zawk atan tunlai thiamna (Information & Communication Technology) te a theih ang anga hman tangkai tum a ni ang a, e-Governance / e-Office pawh tun aia uar zawk leh tangkai zawka hman tum a ni. Tin, hna (file work) chak zawk a kalpui a nih theihnan ruahmanna (file tracking system) tha tak hman tum a ni. Tin, miin an mamawh sorkar / department-a an thlen tam tak te tihhlawhtlin emaw chhan lohin a pil bo in a riral fo. Thil tih theih emaw theih loh pawh nise a chhanna hriat vat hi mipuite chanvo a ni. Chuvangin mipuiten an chanvo rang zawka an hmuh theih nan kalphung tha zawk (efficient delivery system) hman a ni ang. Tin, tuna Office kal phungah file kal vel in dawhkan hrang hrang a tlawh kual hnem lutuk hian hun leh tha a heh hle a, chuvangin kalphung awlsam leh felfai zawk hman tum a ni.

A-2.4(iii) Sorkar Department te thawh hona leh hnathawh enzui:
Mizorama ministry kal tawh ah Ei leh bara intodelhna kawngah Line / Allied Department te thawh hona a mumal lo thin hle a, department hrang hrangte hmalaknaah an in hriat pawh tawk loh avang hian hmasawnna a chak thei lo, chuvangin a theih chin chinah Sorkar / Ministry level atanga thawh hona (Convergence Principle) hman tum a ni ang a, chumi atan chuan Inter-Departmental Working Group siam a ni ang.
Tin, Sorkar hmalakna (project implementation) ah hna chak zawk leh tha zawka thawh a nih theih nan uluk zawka vil leh en pui (Monitor) a ni ang. Hna zawh huna zawh loh vanga hna thawhna sum tihpun (revision of budget estimate) vang hian sorkar sum leh pai nasa takin a riral phah thin a, chuvang chuan a hun tiama hna thawh zawh theih turin uluk taka enpui (strict monitoring) tum a ni.

A-2.4(iv)Sorkar sum leh pai enkawl (Budget Management):
Mizoram sorkar sum leh pai enkawl dan kalphung (Financial Management) hi siam that a tul a. Tun hnaiah Central Sorkar in sum leh pai enkawlna leh hman dan ah State tinte zalenna zau tak a pe a. Hemi zulzui hian Mizoram mipuite tana chhenfakawm turin awmze nei taka sum enkawl dan kalphung tha zawk duan a ni ang. Sorkar sum atanga hnathawhte mipui tana ro tling (concrete assets) ni ngei tura hmalak a ni ang.
Tin, hmasawnna rotling siam nan Central sorkar sum (Grants) bakah External Aided Projects / Loan (eg. World Bank, Asian Development Bank etc.) leh Negotiated Loans (eg, NABARD, LIC, NCDC) tam zawk lak a ni ang.
Mizoram sorkar sum, a bik takin ‘Public Account’ a sum dah GPF, Group Insurance te hi ngun taka vil a ni ang a, Sorkar hnathawk pension hun turte zirchiangin Pensionary benefits hrang hrang Monthly pension, Gratuity, Insurance fund, Leave encashment leh GPF te pawh an pension chhuah rual a, harsatna tawk lova pek chhuah a ni ang. Tin, sorkar hnathawk mekte bakah Pensioner te welfare pawh a tul danin ngaihtuahpui an ni ang, A&T Depatment a thawktu te dinhmun pawh en puiin hnathawktu lakbelh te, hnathawhna tur hmanruate pek belh a, a tul dan a zira district dangah pawh Zonal Officer te pawh ngaihtuah belh a ni ang.
Mizoram sorkar hnuaia department hrang hrangte sum nei loa an awm fo hi a fel lova, chuvangin department tin te’n an hma zawn theuha hna tha taka an thawh theih nan hnathawhna tur sum fel taka ruahman sak an ni ang. Tin, sorkar laipui atanga sum lo kal do letna (State Matching Share) pe thei ngei tura hmalak a ni ang.

A-2.4(v) Mizoram sum dinhmun siam that (Fiscal Reform and Austerity Measures)
Fiscal Reform-ah hian awmze nei tak leh miretheite nek lo zawngin, chhiah hrang hrang khawn a ni ang . Tin, Sorkar pawisa diklo taka kal ral thin ven nan “Tax Deduction at Source” kan hmang ang.
Sorkar sum thil tul lo leh dik lova luang ral thin siam tha turin hmalak a ni ang. Tin, sorkar inrelbawlna atana sum hman tam lutuk hi sorkar tan phurrit a ni a, hei vang hian hmasawnna hna a kal hlei thei thin lo. Chuvang chuan sum renchemna (austerity measures) atan sorkar inrelbawlna senso te ti tlem turin nasa zawka hmalak a ni ang.
Mizoram sorkar leiba pung chak lutuk tih tlem leh leiba rulhte ngaih pawimawh tum a ni. Sorkar sum K-deposit a dah tam thin lutuk pawh hi ti tlem tura hmalak a ni ang; tin, sorkar kumtawp (financial year-end) a sum hman bang hmanhmawh taka chinfel ngai thin hi tih tlem tum a ni.

A-2.4(vi) Sorkar hna lak leh posting & transfer:
Hemi chung changa harsatna awm thinte a lo ziaawm theih nan kalphung mumal zawk duan a ni ang. Promotion chungchangah seniority ringawt behchhan lova a thawktu thiamna leh theihna (merit based/ merit system) ngaih pawimawh a ni ang. Tin, sorkar hna sang leh hniam lam te in buk (proportionate) tawk leh Mizoram state mamawh tawk thlira lak tum a ni.

A-2.4(vii) Sorkar hnathawkte GPF leh TA ngaih pawimawh: Mizoram sorkar a GP Fund lak chhuah a har lutuk hi sorkar hnathawkte’n an buaiphah hle. Chuvangin sorkar hnathawkte tan GPF withdraw dan fel zawk siam a ni ang. Tin, sorkar hnathawk duty a kalte’n TA an lak nghal zung zung theih dan ngaihtuah a ni ang.

A-2.4(viii) Land Reform:
Mizorama kan inhmun/lo ram kan neih dan siam that (land holding system) hi siamthat tum a ni ang a, hemi atan hian ruahmanna thar siamin ‘land reform’ mumal taka kalpui tum a ni. Mimal in ram thalai an neih enkawl si loh tam tak te hi dan ang a lak let (reclaim) an ni ang a, ram neilo te tan pek theih tura ruahman a ni ang; tin, ‘Progressive Tax’ hmanga chhiah lak dan ngaihtuah ani ang a, Buh chinna atan bika ram reserve (Land Utilisation Plan) siam a ni ang.

A-2.5 Dan rorelna (Judiciary) tih chak

A-2.5(i) MNF leh India sorkar inremna a ziah tel Mizoram High Court din a nih theihna turin theih tawp chhuaha hma lak a ni ang. Tin, rang zawka thubuai (Civil leh Criminal case) te chin fel a nih theih nan leh rorelna dik a awm theih nan Public Prosecution Directorate / Cell hawn emaw tihchangtlun emaw a ni ang.

A-2.5(ii) Corruption dona atan State Vigilance Commission (Independent) din a ni ang a, Lok Ayukta rintlak tak din tura hmalak a ni ang. Sorkar hnathawkte kaisanna emaw thubuai (promotion / suspension case) te rang zawka chinfel anih theih nan a bika ngaihtuahtu (Administrative Tribunal) din tum a ni ang. Tin, Family Court/VC Court-te siamin thubuai tenau chinfel zung zung dan zawn a ni ang.

A-2.5(iii) Mipui te zalenna leh dikna humhalh turin State Human Right Commission din tum a ni ang.