Socio-Economic Development Policy

Mi Tin Ban Phak Hmasawnna Chhekfakawm

Category Archive Articles

Ram neitu Thalaite tan – MC. Lalrinthanga

Kan thupuia kan luh hmain he thu hi hre reng turin kan Thalaite ka chah duh a ni. “Kohhran hi mahni ngaih dan leh Pathian thu pawm dan mila din mai mai chi a ni lo, in tih larna leh sum siam nana hman chi a ni bawk lo. Chhungkhatlaina leh hausate dah chungnungna tur a ni lo va, mi rethei leh chhumchhiate rah behna tur a ni bawk lo. Intluk tlan dial dialna kohhran a ni tur a ni. A nihna takah chuan Upa te, Pastor-te leh Rawngbawltute chu Kohhran chhiahhlawh dinhmuna ding tur an ni.”

Mihring tawh phawt chuan nunril leh pawnlang kan nei vek a. Kan nun pawnlawi zawk angin kan nung deuh vek bawk. Thil thleng eng emaw tak a awm loh chuan tu nge ka nih tih hi kan bula miten an hre thei ngai lo. Kan nun lungphum sawi che tham thil kan tawn hian kan nunril/laipui chu a lang chhuak chauh thin a ni. Kan la rah ngai loh dinhmun sanga kan awm hunah te, kan beisei loh dinhmun chhe taka kan tlak luh hunah te, kan neih phak loh kan thianten an neih ni te hian kan ze dik tak chu a lang chhuak thin a ni. He tih huna kan awmdan leh rilru putdan chu kan nun dik tak leh kan ze dik tak chu a ni. Zirlaite mize enna progress reports-ah chuan character tih a awm thin, chu chu nunphung tihna a ni ber. Sap-in character an tih hi chu kan chunga thil lo thleng a zir zela mihring nun dan, a chhe lam, a tha lamin min chim huna kan lo dawnsawn dan hi a ni. Mihring a chunga thil harsa leh rapthlak a thlen pawha ding nghet tlat leh a nun chhungrila chakna inphum nghet tlat te hi pawn lam atangin an hmuhfiah theih tak tak loh a ni.

I ngaihzawng kha a chhungril i hmuh theih loh avangin i neih hnuah i rin aiin a lo nep daih thei a. Thawmhnaw a duh ang ang a inbel theih laia mi hlim thei ber ni thin kha a duh ang a neih theih loh hunah a tum bur mai thei. Fuihna thu tha tak tak sawi tur hria leh sawi thiam em emte hi a tak a lo thlen meuh chuan a nep nep an ni fo thin. An nunzepui kha a rintlat lo tihna a ni Tawngtai peih tak an chhe tak a awm theih a, lam peih em em hrawn hrehawm an awm bawk. Nunzepui chu kan nun min nuaitu thil chi hrang hrang laka kan âwm nem leh khauh dan hi a ni. Chu chu a rintlak loh chuan thil tha lo lakah himna a awm lo. |hian kawm azirin kan chhiain kan tha vel mai mai a, chawhmeh a zirin kan zaidamin kan thinchhe kual vel bawk thin. Dam khawchhuak turin he nunzepui kan tihtak hi a nghet tur a ni a, a mumal bawk tur a ni. Nulain nula nalh deuh a hmuhin ama incheina a ngainep mai tur a ni lo. Mipa hausa deuh a hmuhin amah hringtupa a iai phah tur a ni bawk lo. Mani inhmusita mi dang nih duh hun hun chu ât hun a ni mai.

Lal Isuan tehkhin thu a sawiah khan, in sak pahnih kan hmu a, a innghahna lungphum erawh a inang lo. Pawn lam atang chuan a khawi zawk nge rinawm zawk tih a hriat loh. Mahse, lir a lo nghing emaw, tui a lo len emaw, thlipui a lo tleh chuan a rinawm leh nghet zawk chu hai rual lohin a hriat theih chauh a ni. Thlipui leh ruahpui lo thlen hmaa an lan dan anga awm chu a theih tawh loh a ni. Tiauvuta in sak chu a sawp ta nul mai a nih kha, a lungphum a rinawm loh vang a ni. Ram neitu thalaite pawh hian hei hi hria ila, thlemna tawh vanga tluk aiin thlemna tawk tlak khawpa chakna nei i ni ang u. Zu in te hian sawrkarin a phal vang leh a awm vanga in ni loin, kan hnar theih loh vanga in kan ni zawk lo maw? Zu awm loh vanga in lo te hi zu ngam an ni reng reng lo, a awm teuh pawha ngainep leh in lo thalaite hi zu ngamtu dik tak te chu an ni.

Hnam incheinaa inbel rang nasa tak tak te hi Mizo aia Vai ngaina an awm thin, Mizo zepui hi thuam lamah ni lovin, chhungril lamah a awm zawk a. Tawlhlohpuan ngaina tak thlan lai ngai lo, puanchei ngaina em em YMA hnatlanga kal ngai lo an awm thin. Kan ramah hian thalaite zingah mahni intihlum kan tam sawt hle. Heng ho hian an thil tawn hrehawm sawi tur an hre ngei ngei ang. “A dinhmun kha a harsain a hrehawm em a ni,” ti te pawh kan awm thin. Mahse, a tawrh ang tuar ve tho thalai tlusawp ve lo, a retheih ang thoa rethei ruihhlo khawih phah ve lova, zu pawh in bawk lo, a tuar ang tuara titau ve lo, a hlawhchhamna ang thoa hlawhchhama beidawng hauh lo thalai an tam a ni. Ram neitu thalaite u, i nunzepui kha enchiang ula, mangan ni atan a rin tlak em? tih inenfiah rawh. Khawvelin kan nun min khawih chhiatsak theih leh kan hma lam hun min tihchhiatsak thei thil tam tak a la rawn pho chhuak zel dawn. Nunzepui nghet i neih loh chuan mi tihdan entawnin i tar thi thak mai ang.

Media hian mite nunah thu a nei thuk lutuk tawh. Nang erawhchu inveng la, TV leh Internet atanga i thil hmuh te hi i nundan reltu a nih phal reng reng lo ang che. Nunze nghet nei lova nghing mai mai mi nih hi vanduaithlak tak a ni. Hetiang mite hian humsual an dai nge nge thin. Be All You Can Be ziaktu John. C. Maxwell chuan, “Vawiinah nun man i pek hmasak chuan, nakinah a pung nen i la tel leh ang a, nun i chen hmasa a nih vaih chuan nakinah a pung nen i la rul leh vek ang,” a ti a ni. Nun chen hmasa a pung nena rul leh mekte awmdan hi a awhawm loh a nia. A chhiat a that bihchiang hmasa lova mi tihdana innghatte chanvo a ni tlangpui.

Thiamna sang zel avangin zawh atana tha lo, kawng zawh chakawm kan hmu tam tual tual a. Hengte hian kan nun tha min laksak i phal hauh lo ang u. Thei kung mawi lai ber chu a par lai hi a ni. Mahse, a pawimawh zawk chu a rah awmdan a ni. Thei kung venhim ngaih lai chu a par lai a nih ang hian thalaite hi in mawi ber lai hunah in par mek a, in ven that in mamawh ber hun a ni. Tichhe tur che u hian thil itawm tam tak in hmachhawn mek a, hetih hunah nun inchen a nih vaih chuan in la tap ngei ngei ang. I nunah harsatna ni a lo thleng a nih pawhin hringnun nihphung a ni tih hrereng ang che u.
Hringnun hi tuifinriat ang a ni a, Lui pangngai luang pawh hi mawi taka fawn chang te, rapthlak taka fawn chang te a nei thin. A fawn mawi hlimpuitu chuan a fawn rapthlak pawh a pawm thiam tur a ni. A tha lam leh chhe lama nundan thiamte hi nun rintlak neitute chu an ni.

Mipuiin sorkar thlak turin an inpeih a, a thlaktu tur an la inpeih lo -Rualkhuma Hmar

Zoram kalphungah leh America kalphungah pawh party pakhatin term 2 aia rei hi chu an tlin meuh thin lova, rinbloh takin an tla leh mai thin.

Nakum kum leh maia inthlan kan hmachhawn turah pawh hian rorellai party hi chu mipuiin thlak ve hrim hrim hun an ti tawhin a langa, an chhuanlam tur thenkhat chu:-

  1. Zu Zawrh hi Kristian hlang awmna state ah chuan kohhran mi tam takin thalo an ti. Kan inthiam dawn lo tih a chiang tawh a. Thalai leh pavalai tam takin an zo lova an chhiat phah zawk avangin.
  2. Kawngchhia: Ruling party hotuten kawng a chhia tih chu an pha lova, kum 15 lai kal ta amite an puh ta mai mai a . Tih tak zetin hna an thawk lo tih chu mi nawlpui pawm dan a ni.
  3. Lirtheia eizawng: Motor chhiah kum 15 la lawka kum 8 kum 9 bak service phal leh siloh hi lirtheia eizawngte chhungkua 4000 zet leh private car neite tan pawh hnawk sak an ti viau ang.
  4. Power : Power-a intodelha, athlawn deuh thawa engchhit a hun tawh laiin MW 20 pawh kan la siam chhuak theilo hi chuan mipui a ti beidawng. Kumtin engchhit man tisanga , mi state siam lei kumkhua ringawt hi chu mipuiin awm an ti tawh lo. Nakuma hawn tura beisei Tuirial lah chu MW7 chauh kan chang dawn a, kan ram lui nisi a power siam chhuah kan lei leh tho tur hi chu a that dan a ziktluak lo.
  5.  Chaw a intodelh: Kan chaw rinpui ber buh a intodelh tur hian official te chuan thahnem an ngai hle pawh a ni thei e. State kan nih hnu pawh kum 30 lai a lo liam tawh hnua thla 4 ei pawh kan la thar theilo hi chu ministry mawh ani lo thei lo, chaw rinpui ber a intodelh hi chu mipuiin tul an ti tawh . Vai buhfai supply tu tur thlan thu a duh sak zawng te nen a hnungthak inhiah tawn vel hi thenkhat duhtawk vel a ni a, mipuiin an tawngkhawp tawklo.
  6. Sikul kai hun sawn hma leh tan hun inanglo hi Zokhuaah chuan an duh lo zawk hle mai.Sorkar thlakna khawpah an ngai.
  7. Corruption : Ram hruaitute hi han insawi mam sa teh mahsela party chhunga thil hrechin tam takin ngawi rengin an awih lo. Corruption hi a nasat chuan party chhunga a chang velo ten an lo thik ve hrim hrim a, chumi/khami hming chuan thibehin contract lian an thawk tih te hi a rukin a tlangthang vek thin. Hnam dang company lian te nen high level-a inthlunzawm ruk tlat hi mi tam takin an duh lo. Kan ram contract chhiat leh zawh har chhanah an ngai.
    1. Mizo Carbon company in thawk tha mangsilova , Subsidy Vaibelchhe tel an la te hitin, Rs 103482311.00 lak leh tura an la recommend cheu te hi mipuiin sorkar corrupt zia lannah an ngai tlat.
    2. M/S Mizoram Ispat industries Ltd. Lengtea mite hian thil siam chhuah (Finished Product) pakhat mah nei silovin Rs. 59112115, Subsidy la tura recommend an ni te hian High level corruption a tam mipuiin an rin phah a, mi tam tak rilru a tina, ruling party woker te ngei pawh. He Industries hian ni 1.7.2012-ni 31.3.2015 chhung hian thil siam chhuah pakhat mah anei si lo. Hei hi RTI Zawhna chhanna a alan dan a ni.
      Heng te leh thil dang dang avangin mipuiin sorkar lai hi chu an sual em em vang pawh nilovin thlak ve hrim hrim turin an rilru an siam ru thap nia ngai an awm.

A Thlaktu tur lam hi le. Sorkar thlak tum apui an tam.
1) Dr Zaichhawna sapram atanga lokir khan a tuma a reh leh tawh.
2) Prism leh MPC te intel khawmin thlak an tum- mahse an inhrual mum hmanlo. Hmanniah MLA kan chuh dawn tih an puang a,tel tura sawi pawl pakhatin a phatsan leh pang mai a,Unit an la nei tlem an thu leh hla ala darh nasa lo, 2018 atan chguan an tlai tawh Aizawl ah bak bu an khuar lo.
3) ZNP chuan sorkar lama tel an tum ruh hle a, rorellali thlak tum aiin awihnun an tum hlauh zawk. Awi nung zo tak maw? Lawng pil meka chuang tur nge an nih? Lawng pil meka chuan chu kan tirit sauh a, a pil thuk ting mai a ni.

4) BJP Anni hian President thar an neih atangin an in ban then nghal a, a bang zat nge tam , alut lam tih hi chhut tham a ni a, Modia boruak lian viau mahse Mizoram Congresssorkar thlak tur chuan an la inpeih hman lo deuh ang. Khawthlang lamah Seat 2, Seat 3 te chu an la mial mai thei tih chauh a ni.

5) C.LALTANPUIA Pawl: Ani hian Zoram hi a vei na ngaing mai a, athuchhuah pawh a tha, sen pawh a in seng fe tawh ang. Member nuai 3 kan neih chuan an ti a, hei hi chu a la huphurhpui awm deuh vang.

6) MNF: Anni hian MLA 5 an nei sa a, 16 an la mamawha, chu chu kum 2 tling meuh tawh lo chhung hian an inpeih hman ang em? Kum 2013 kha chuan an inpeih hman lo . A hotuten seat an zawng rei lutuk a. Policy tlang hlelhawl a chiap thei nazawngin an sawi theih tur an hrualmum hman lo. (Centralah khatih lai khan (2013 Dec) Congress an la sorkar). Thawhpui an neih khan ati tuan fum.
VVPAT bial 10 ah hmang a ni a, MNF in an hmang tangkailo. A hunah chhiar turin nawr hek lo, Vawinah pawh hian sorkar thlak tur chuan an la hriam tawk lo. Sorkar dinglai corruptionah an la ti mualpho nasa lo. Court-a kal awm tak naah an la kal chak tawk lo.
Policy an duang chipchiar lutuka an peih har mah mah . Kumthar ni 1 atangin ka vaibel tih tluk a an chian angai.
Zep lovah chuan tun dinhmunah chuan Sorkar thlak turin an la inpeih chiah lo . Mi tam takin ring thawkhat mahsesorkar thlakna atan itawm hliah hliah angin an la langlo deuh. Kum 2 che che la awmah hian systematic taka an inbautsaih chuan . Sorkar an thlak thei ang. Centrala BJP (Modia) Chakna an la chhawr tangkai tawk lo bawk.
A hotuten thurawn tha an pawm thiam chuan Sorkar thei an ni. Sorkar thlak turin chance (remchang) an nei sang ber. EVM bawk an zir chian angai .Company thlak mahse tham theih loh an tam lovang. Athat dan ber chu VVPAT an tih kha bial 40 ah hman ngei ngei turin nawr sela High level official te leh mi hausate game san zia leh an trick san zia hi an hriat a ngai.
Kum 2013 inthlanah khan EVM kha a hre ril tak tak chuan riging ngeiin an ring a, a tlinga ten vote chhiar that an hlauh em em danah leh K.Chhawnthuama an ngaihmawh em em danah khan thil diklo chu a awm ngeiin a rinawm a, Khatiang thil rinhlelawm kha pumpelh turin MNF te hian fing leh huai tak a tan an lak a ngai. Congress nilo, MNF nilo zawng hi pawl khatah awmin, Mizo awmlohna vairam khawpuiah pawh MP ni thei, H.T Sangliana CM tura zuarin inhlawm khawm thei sela chuan mipuiin an awn thup a rinawm tehreng nen, thawkkhat lai khan a lokal a boruak pawh a arawn thlithlai viau a, mahsela remchang a awmlo ni ngei tur a nia, boruak a awm ta rih lo.
Chuvangin tha kan ti viau emaw ti viau lo emaw congress thlak tur chuan MNF ah bawk kan inthlak dawn ni hmel ani. Anni MNF hotute pawhin mithar langsar deuhte sawmin Congress sorkar thlak ve hrim hrima lungawi tum lovin, hnam dinchhuahna leh ngelnghehna tak tak sorkar siam turin inpuahchah sela, Zoram mipui mamawh chhanna tling sorkar siam turin insiam tha rawh se.
Mipuite hi bum leh rahbeh zel tlak kan nih tawh loh hi . Kristian rama sorkar ni awm renga mi rin turin i awm hlawm teh ang u. Kan ram leh hnam tluchhe mek hian chona lian tak min hlui mek anih hi.