Socio-Economic Development Policy (SEDP)

SOCIO-ECONOMIC DEVELOPMENT POLICY (SEDP)
SEDP tihpuitlinna tur Programme pawimawh panga-te

SEDP thiltumte hlenchhuak tur hian Development Programme pawimawh panga (5) duan a ni a, chungte chu:-

  1. Ei leh bar intodelh (Green Revolution)
  2. Thil siamna lam (Industrial Development) leh a siamsa hralhna lama (Trade & Commerce) hmalakna.
  3. Mihring theihna tihpun (Man Power) leh Technology lama kal chak.
  4. Mipui dinhmun dawm kan (Social Development) leh khawtlang nun nuam (Social Security)
  5. Hmasawnna ruhrel siam leh ram pawn mithiamte koh luh (Invest in Mizoram)

Socio-Economic Development Policy tum ber chu ei leh bara intodelhna, vantlang nun tha, mipuite hlimna leh ngelnghehna siam a ni. He Policy-in a tum leh huam theih tam tak zingah, ram pumpui hmasawnna tehna bulpui ber – Gross Domestic Product (GSDP) tihsan nana Industrial Development Programme chak taka kalpui te a ni. Vantlang sum leh pai dinhmun siamthat leh tihngheh te, chumi thleng thei tura mitin ten an thawh phak tur hna siamsak (Creation of employment opportunities) te, sumdawnna remchang leh tha zawk (favorable business environment) siam te, mipuite thleng phak hmasawnna tluantling pek te a ni.

Retheihna nuaibo (eradication of poverty) chu he Policy hna hmanhmawh leh tum bulpui ber niin, hmasawnnain a la thlen phak loh (economically deprived people) te chhanchhuah leh leirem an rah theihna tur atana remchanna buatsaih sak chu hna hmasa ber zinga mi a ni. Vantlang mamawh heng – tui thianghlim, electric current, inkalpawhna tha, hriselna (health care), zirna tha, etc. ram mipuite’n rualkhai taka an chan theihna tur pek te, ram changkang leh changkanglo tehna bulpui ber pakhat – nausen thihna (infant mortality) leh nu nau chunga thihna (maternal mortality rate) tihhniam te a huam a ni. Ram hmasawnna ruhrel rintlak ngaihtuah leh ram tana hmathlir thui (long-term vision) duante hi tihmakmawh, he policy in a tum (address) te chu an ni. Heng kan sawi tak te hi economic development huamchhungah kan dah thei awm e.

Tin, kan sawi tak zawng zawng awmze neih tirtu leh tihlutu ber, a chentu leh hmangtu, a tellova hausakna leh sum leh paiin awmzia a neih loh, mihringte khawsak inrelbawlna tihhmasawn hi ‘social development’ kan tih chu a ni a. Ram changkang apiangah mipuite an thla a muang thin a; vantlang nun a hlimin a ngelnghet bawk angin, he policy hian mipui vantlang hmasawnna a hawi (target) tlat bawk a ni. Ram mipuite hlimna leh lawmna (happiness of the people) ngaihtuah te, hriselna leh thianghlimna (health & sanitation) tha te, pawikhawihna leh suahsualna (crime rate) tihhniam te, rilru hrisel (public morality) ngaihtuah te, a tawi zawngin vantlang mamawh leh hmasawnna hrang hrang (community improvement programmmes) te hi he policy-in a huam (address) te chu an ni.

Heng kan sawi tak pahnihte hi hmasawnna kalkawp tlat (intertwined) anih avangin SEDP hian a keng kawp a ni.

SEDP Ruangam (Structure)

He SEDP hnuaia ruahmanna te chu hlawm lian deuh deuh pahnih (2)-ah then a ni a, chungte chu:

Economic Development Policy & Programme:
He Policy in a tum chu nasa taka buh leh bal thar chhuah tihpun (Green Revolution) a ni. Chumi in a huam te chu, Buh leh bal thar chhuah (Agriculture & allied activities) te, thil siam chhuah lam tih hmasawn (Industrial development) te, hmasawnna ruhrel siam (Infrastructure Development) te, Sum lo luan luh nana pawn lam mi hip luh (Creation of trade and Investment environment) te an ni. Mizo takleh Hnam rilru puiin Economic-a hmasawnna (Economic Nationalism) kalpui a ni ang.

Social Development Policy & Programme:

Hei hian vantlang nun nuam leh hriselna tha zawk atana hmalak te, mihring chakna leh theihna hman tangkai (human resource development) te, thalai hmasawnna leh hmakhua (youth employment and services) te, infiamna lam (sports) policy te a huam bawk a ni.

SEDP kalpui dan tur (Delivery system)

He programme hnuaia ngaih pawimawh (address) tur te chu – Mirethei (BPL) te dinhmun chawikan, Eizawnna neilo (unemployment) te hnena eizawnna ngaihtuah pui, intluk tlan lohna (inequality) tih tlem te a ni. Tin, ei leh bar tur tam tham thar chhuah, vantlang nun tih hmasawn leh hmasawnna ruhrel lian tham siam (macro-economic development) a ni. SEDP tanpuina chu hlawhtlinpui tham ngei turin kalpui an ni ang.
Tin, a thlawna pawisa sem ringawt lovin inkaihhruaina mumal tak nen hna (trade) hrang hrangah training mumal tak nen tanpui an ni ang. Tanpuina leh chhawmdawlna te chu heng hmang hian pek tum a ni:
i) Grants ii) Price Support iii) Subsidy iv) Loan
SEDP hnuaiah hian Co-operative system uar zawka kalpui a ni ang a, hemi tih hlawhtlinna atan hian mipuite tana hna siam chhuah (Out-sourcing policy), Sorkar leh mimal/pawl thawh hona (Public Private Partnership Policy) leh Social Audit System te nasa zawka hman tangkai a ni ang.

Ei leh bara intodelhna (Economic Policy & Programme)

He Economic Policy in a tum ber chu buh leh bala intodelh (Green Revolution) a ni. Hemi baka ngaih pawimawh chu “Mitin tana eizawnna kawng sial sak” (Economic Activities for All) a ni. Mizoram ah economic policy kan la kalpui fuh tawk loh avanga ei leh bara kan la intodelh loh zia thlir chungin MNF party chuan kan ram intodelhna tura ruahmanna te theihtawp chhuahin a duang a, hemi lama mithiam hrang hrangte pawh a rawn a ni. Ram hausakna hman tangkai tur tam tak kan neih laiin chhawr tangkai turin hna thawktute’n thiamna kan la nei tha tawk lo a, chuvangin tun aia kan ram hausakna hmang tangkai tur chuan hnathawktute thiamna (Human Resource Development / Capacity building) pek hmasak hi MNF party chuan tihmakmawhah a ngai a ni. Mizoram ei leh bar (Economy) in nghahna lian ber chu sorkar hna (service industry) a ni a, thlai thar leh thil siam chhuah (agriculture & industrial sector) chuan a thawh tlem hle a ni. Kan ram mipui 60% vel zet te agriculture lama eizawng an nih laiin agriculture leh a kaihhnawih a kan thawhchhuah (GSDP) chu 17% vel chauh a ni. He kan dinhmun hi thlak danglam dawrh khawpa Agriculture leh a kaihnawih bakah thil siam chhuah (industry) te hmanga economy chawikan hi MNF party chuan a tum a ni.
Tin, Zoram mipui tam takte rilru puthmang, a thlawna sum hmuh leh dawn beiseina rilru hi siam tha tura uar zawka inzirtirna (moral reformation programme) neih hi MNF party chuan tul a ti hle a, Mizo pi leh pute rilrua mahni intodelh tumna rilru kha din thar leh kan tum a ni. He Economic Policy hlawhtlinna atana ngaih pawimawh te chu hmanraw tha zawk nena hnathawh (Mechanization), Company leh Industry te sorkar kuta awm lova mimal kuta dah (Privatisation) bakah tam tham law law thar / siam chhuah (Large-scale production) te an ni. India sorkar Act East Policy kalpui mek chhawr thei tur leh kan thlai thar thawn chhuak tura inbuatsaih tum a ni.
Mi taima leh a thawk tak tak te’n hlawkna an hmuh theih nan chhawmdawlna tha tak ruahman sak an ni ang. Tin, mahni kut kea eizawnna bul tan duh te chu tanpuina (grants leh soft loan /free interest loan) hmangin bultan pui an ni ang. Tin, eizawnna tha thawh tur hria ten bultan nan loan an lak dawnin, vanduai leh harsatna bik vanga an rulh theih loh palha rulhsak tu (Guarantor) atan sorkar/Village Council atan dan ruahman tum a ni.

 AGRICULTURE LEH A KAIHHNAWIHA HMALAKNA TUR
(Agriculture-horticulture & Allied Sectors)

Hun kaltaa Zoram kuthnathawktute harsatna pakhat chu eizawnna (trade) chi hrang hrang atana sorkar department te hmalakna in thuah (overlapping) tam lutuk thin te mumal zawka kalpui turin Convergence scheme hmangin kuthnathawktu chhungkuate dawmkan tum an ni ang. Tin, sorkar laipui atanga sum lo kal (CSS) te awmze nei zawk leh tangkai zawka hman a ni ang a, loneitute’n a hralhna (market) hre saa thlai an chin dan tur ruahman a ni ang. Kan ei leh in atanga natna thalo (Cancer etc.) thlen thei heng – Sa leh Thlai vawnthatna leh Hlo tur (Toxic Chemicals) te laka mipuite him nan ruahmanna tha zawk siam a ni ang.

B-2.1(i) Chaw/Buh leh Bal-a intodelh:
Zoram mipuite’n chaw a kan rinpui ber buh a intodelh turin nasa zawka hmalak a ni ang. Mizoram hi hnamdang karcheha awm kan nih avangin buaina a awm hlekin chaw kan nghei mai dawn thin a, chu chuan min ti huaisen ngam lo fo. Chuvangin, a tul huna huaisen leh dik taka ke pen ngam turin chaw a intodelh hi thil tul leh pawimawh ber pakhat a ni. Hemi ti hlawhtling tur hian buh chinna atana kan ram neih tha laite khawl hmang (mechanization) in buh tam tham law law thar chhuak (large scale production) tura hmalak tum a ni. Hemi atan hian buh herna khawl (Rice Mill) leh a chhiat mai loh nan sawngbawl (dehusking and polishing machine) din tum a ni ang.
Leilet-a siam theih hmun remchangah te mimal leh pawl (Society / Farmers Association) te hmang tangkaia Buh tam zawk thar chhuah leh hralh kawngah hmalak tum a ni. Mizoram in thla khat atana buhfai man kan sen hi cheng vaibelchhe 23 vel a ni a; tin, buhfai lei nan thla khatah Rs vaibelchhe 10 zet sorkar in a hloh ziah ang a ni. State dang atanga kan buhfai lakluh leh kan senso titlem tur hian buh thar tipung turin nasa taka hmalak a ni ang; tichuan, state pawn ami buhfai leina sum tam tak chu zoram kuthnathawktute kutah a lut thei tawh ang (Mizoram Buh-a intodelhna Project detail Annexure-II ah dah ani).

B-2.1(ii) Thlai thlanbik te chin uar (Special Project atan): State dang atanga kan lakluh tam thlai heng Alu, Purun, Zikhlum, Parbawr, Dal, Bekang, Chhawhchhi, Chana te bakah Bean, Wheat, Antam etc. te hi leilet a buhseng zawh ah chin uar a ni ang a, leilet leh tlangram terrace atang hian Mizoram-a kan chawhmeh mamawh zual intodelh tura nasa taka hmalak tum a ni.

B-2.1(iii) Tlangram lo neitute dawm kan:
Tlangram lo neih hlawk zawka kalpui turin (Improved farming technology eg. Hillslope terracing, Contour trenching, Changkham) in zirtir uar leh hengte hmanga loneitute dawmkan tum a ni a, mumal zawka loneitute puihdan pawh ruahman a ni. Tlangram lo neih hi tihtawp mai chi a ni lova, leilet kan neih tlem avangin tlangram lo neih hmanga buh thar tihpun tum a ni a, loneitute puih dan tur pawh ruahman a ni. Tin, buh thar a tam theih nan buh china tur bik siam fel (earmark) a ni ang. Tin, ngaw leh tuihna humhalhna atan ruhmanna (Jhumming Regulation) siam a ni ang. Tin, tlangram terrace (hillslope terracing) siama buh tam zawk chin leh thar chhuak tura hmalak a ni ang (A detail Appendix- III ah dah a ni).

B-2.1(iv) Huan siama eizawngtute (Horticulture Farmer): Huan nghet neitute dawmkan nan leilung awmdan a zirin thlai chin hlawkna mual (cropping zone) hrang hrangah then a ni ang a, huan neitute dinhmun chawikang turin a chin atanga a hralh / dehral thlengin awmze nei zawka chhawmdawl an ni ang. Eizawnna (trade) in ang leh zau khat (Compact area) a awm ten a huhova hma an lak theih nan Society / Farmers Association te hmanga hmalak tum a ni a, Sorkar department te’n enpui hna (monitoring) uluk zawka thawkin kawng hrang hrangin an chhawmdawl ang.
B-2.1(v) Agriculture link roads & tuilakna (irrigation) siam: Loneitute tana awlsam zawkna turin motor luh theihna tur feh kawng (agriculture link roads) tam thei ang ber sial a ni ang. Tin, loneitu / huan neitute mamawh phuhru turin tuilakna (irrigation) leh ruahtui khawlna (rain-water harvesting) siam turin nasa zawka hmalak a ni ang. Hmun hrang hrangah tlang sang rem laiah ruahtui khawlna hmun lian tak loneitu / huan neitu chhungkaw tam takin thal laia an inhman tawm tur siam tum a ni ang.

B-2.1(vi) Thlai leh thei sawngbawlna (Food & fruit Processing)
Ei leh bara intodelhna turin thlai thar sawngbawl (food & fruit processing) hi a thar chhuah ang bawka pawimawh a nih avangin sorkar laipui pawhin a hranpa liau liauin Ministry of Food Processing a din hial a ni. Chuvangin, Mizorama kan thlai tharte awmze nei zawka vawnthat leh sawngbawl lam buaipui turin Food Processing Department thar din emaw a nih loh pawhin Horticulture / Industry department hnuaiah Food / Fruit Processing Wing siam a ni ang.Tin, Mizoram budget ah Food Processing atan awmze nei tham sum a hranpa a dah a ni ang.
Kan rama thlai tharte vawn that leh sawngbawlna turin Cold Storage leh sawngbawlna (processing units) tam zawk bun tum ani ang. Kan thei leh thlai pawimawh zual – Serthlum leh ser chi hrang hrang, lakhuihthei, sapthei, Red Oil Palm, Sawhthing leh aieng sawngbawlna khawl (processing plant) te dinin a awmsa tih changtlun a ni bawk ang a, tin, Bekang leh Vaimim atanga chaw leh ranchaw herna khawl(processing plant) pawh din tum ani ang. Kuhva chin tamna hmunah a sawngbawl (Scope) na changtlung zawk siam a ni ang. Grape chingtuten hlawk zawk leh mumal zawka an hralh theih nan sorkar in a buaipui ang. Tin, thingpui leh Coffee tharte pawh Tea Board leh Coffee Board te thawhpuiin mumal zawka sawngbawl leh deh ral dan ngaihtuah a ni ang.
B-2.1(vii) Contract Farming-a hmalakna tur:
MNF Sorkar hmasa a kan hlawhtlin pui em em Contract Farming sytem hi kuthnathawktute chawikanna tur SEDP kalpuina tur hmanraw pawimawh taka hman tum a ni. He system hi Red Oil Palm chinna atan hlawhtling taka hman a nih tawh avangin thlai dangah pawh hlawk zawk leh hausakpui thama kalpui tum a ni. Tin, tuna kan kalpui mek leh hman (practice) mek aia tha leh chhenfakawm zawka kalpui tum a ni bawk. Mizoram-a kan chin uar leh pawn lam thlenga hralh theih thlai thlan bik te a chingtu ten hralhna ah buaina an tawh loh nan Contract Farming nasa zawka kalpui tum a ni a, hemi atan hian Agri-Bussiness Firms / Company rintlakte thawhpui an ni ang. Mizoramah Producer Company rin tlak pahnih khat tal din ve kan tum ang.

B-2.1(viii) Thlai thar hralhna tha ngaihtuah (Marketing & Price Support)
Thlai thar hralhna chung changa harsatna leh a man hniam lutuk vanga kuthnathawktuten harsatna nasa tak an tawh thin avangin thlai thar hralhna (marketing) lamah nasa taka hmalak tum a ni. Mizoram a kan thlai tharte man man zawk a kan hralh theih nan a hralhna lam inhriat tawnna (market information system) mumal tak nei tura hmalak tum a ni. Tin, man to zawka an hralh theih turin sorkar puihna (price support) ruahman a ni ang. Hengte buaipui tur hian Farmers Association te thawhpui an ni ang. Kan thlai tharte hralh chhuahna dan (Distribution System) thar ‘Terminal Market Scheme’ siam a ni ang. (Appendix-III en rawh)

B-2.1(ix) Sawhthing hralhna(Market) ngaihtuah: Sawhthing hi Mizoram-ah a tha duh a, tin, ram dangah mamawhna a sang hle bawk; chutih rualin a hralhna man(rate) a mumal loh thin avangin sawhthing chingtute an beidawng fo. Chuvangin, sawhthing chingtute dinchhuahna turin ruahmanna siam a ni ang a, kuthnathawktute’n a hralhna (market) hre sa a an chin theih nan India ram leh ramdanga sawhthinga sumdawnna kalphung zirchianna (market chain analysis) neih ani ang. Tin, Sawhthing chingtute’n tha thlawn an sen loh nan Sawhthing hralhna ah sorkar puihna (Price Support) siam a ni ang.

B-2.2 MAU LEH RUA HMANGA EIZAWNNA
Rua/ Mau chin leh sawngbawl hmanga eizawnna hi Mizoram hmasawnna tur pawimawh tak anih avangin sorkar laipui pawhin a ngai pawimawh hle a ni. Chuvangin MNF party chuan rua/ mau hmanga Mizoram ei leh bar (economy) siamthat hi a tum a ni. Mizoram ah raw lian leh tha zawk ching turin nasa zawka hmalak a ni ang a, tunlai thiamna (tissue culture) hmanga mau chi tha siam chhuak tura hmalak a ni ang. Bamboo Industry te hian tha zawka hna an thawh theihna turin thuam that a ni ang a, tangkai zawka kan maute hman anih theih nan training tir an ni ang; tin, hemi lama tui mite chu Bamboo Processing Technology zir turin India ram hmun dang leh foreign ah te tirh chhuah tum an ni ang. Mizoram a kan rua/ mau neih te thalaite eizawnna atan hman tangkai tum a ni ang a, kan rua/ maute a puma hralh loin sawngbawl sa a thawn chhuah tum a ni ang.
Bamboo chipping Unit din tawhte hi thuam that leh tihchangtlun tum a ni ang. Heng bamboo chipping unit a khawl te hi an tha tawk lova, chuvangin siam that leh hman tlaka siam a tul avangin hemi atan bika hman tur hian sum hran pa (revolving fund) dah tum ani ang. Tin, kuthnathawktu leh industry ten an hlawk pui theih nan Mizoram industry atanga bamboo product hralh chhuah leh thawn chhuah turah price support leh transport subsidy te siam tum a ni. Industry Department hnuaia Bamboo Development Agency (BDA) awm mek hi hna thawk tak tak thei tura siam leh thuam that a ni ang a, mau hmanga eizawnna leh sum deh chhuahna atana nasa zawka hma lak a nih theih nan Bamboo Development Corporation din tura hmalak a ni ang. Chu chu Mizoram a Public Sector Undertaking thenkhat ai chuan a tangkaiin a hlawhtlinpui theih zawk tura ngaih a ni.
(Raw chin dan Project Detail Annexure-IV ah dah a ni) & (Mau chin dan Annexure-V ah dah a ni).

B-2.3 Rubber:
Rubber hi Mizoram-ah pawh kan ram awmdan, sik leh sa dinhmun leh kan ruahtui dawn dante en in chin tlak leh kan ram dinhmun nena inmil tak a nih bakah engtik lai pawha hralhna awm a ni a, chuvangin uar zawka chin tum a ni.Tin, a hralh chungchang (marketing) ah society kutah dahin tanpui an ngaihnaah sorkar in a tanpui ang. Tin, a enkawl leh tharchhuah awlsam zawk nan a theih chin chinah kalkawng (link-road) laih a ni ang. (Rubber chin dan tur kimchang Project Detail Annexure-VI ah dah a ni)
B-2.4 Hmunphiah:
Hmunphiah hi kan rama chin bakah a tualto pawh tam tham tak kan neih avangin ngaih pawimawh a ni ang. Tin, hmunphiah chingtute leh eizawn nana hmangtute hmathatna ngaihtuahin sorkar-a chhiah (royalty) hniam thei ang ber lak a ni ang. Hmunphiah hi man tha zawka hralh a nih theihna turin a dah khawlna tur In (Go-down) hmun hrang hrangah sak a ni ang. Hmunphiah siam sa (ready-made) a hralhchhuah hi a hlawk lehzual dawn avangin a siamna tur hmanrua/khawl dinna kawnga a tuimi, mimal /society te chu chhawmdawl an ni ang.

B-2.5 SERICULTURE (Silk / Maimaw Pangang Khawi)
Sericulture hi Mizoram sik leh sa nen hian a inmil avangin kuthnathawka eizawngte chawikan nan a tha hle a ngaih a ni. Mizoram hian Industry lian siamna turin thil tul (infrastructure & raw-materials) a nei tha tawklo hle a, Sericulture-ah erawh chuan hmanraw hautak vak loin eizawnna hlawhtling a neih theih a ni. Chuvangin, Sericulture Department hnuaiah nasa zawka hmalak tum a ni ang a, pangngang khawi lama tui mite chu an mamawh hmanrua bakah maimaw pangang chaw-thingtheihmu, nauthak, bul, mutihte an chinna tur tanpuina pek an ni ang.
Tin, Mizoram District hrang hranga Sericulture Office awm mekte hi hna thawk tak tak thei tura thuam an ni ang. Reeling and Spinning Centre te tangkai leh chhawrnahawm zawka tihchangtlun tum a ni ang a, tunlai khawl changkangte bun a tihlen a ni ang. Chuvangin Mizorama silk pangang khawitute sum lakluh ti sang turin chhawmdawlna (price support) siam a ni ang.

B-2.6 RANVULH LEH SA THAR CHHUAH TIHPUN (Animal Husbandry & Veterinary)
Mizoram ah sa chi hrang hrang, bawnghnute leh Artui hnianghnar leh hrisel zawk kan hmuh theihna tur leh helama eizawngtute dawmkan na turin awmze nei zawka hmalak a ni ang. Ran chi hrang hrang heng Bawng, Sial, Vawk, Ar, Kel etc. vulh lama tuimite chhawmdawlna leh tanpuina tur ruahmanna siam ani ang. Ranvulh leh sa tharchhuah kawngah Sorkar leh kuthnathawktu / ranvulhtute thawhhona tha zawk a awm theih nan te, ranvulhtute’n awlsam zawka harsatna an thlen theih nan leh chumi sutkianpui dan turte sorkar in a ruahman ang. Thalai lehkhathiamte tan ranvulh hmanga eizawnna (Young Farmers’ Scheme) siam tum a ni.
Thingtlang khuaah te ranvulh nasa zawka kalpui turin ranchaw chinna leh ran tlatna tur (Grazing Ground) siam a ni ang. Tin, fimkhur zawka ran chi tha chawkluhte, ran vulh atanga natna kai theih chi hrang hrang laka inven dan ah te ruahmanna felfai tak duan a ni ang. Hmun tam zawkah ran thlun khawmna (Cattle pound) leh ran talhna (slaughter house) siam a ni ang a, khawpuiah sa dawr thianghlim (Standard Meat Shop) siam tum a ni. Tin, ran ek leh savun / sa ruh hmanga leitha (bone meal), savun (leather) leh Bio-gas siamna hmun tam zawk siam ani ang. (Appendix- VII en rawh)

B-2.6(i) Sangha tharchhuah (Fishery Development):
Mizoram hi sangha ah kan la intodelh lo hle a, kan Sangha mamawh zaa sawmli (40%) vel chauh kan thar chhuak a ni. Tin, Mizoram-a kan sangha tharchhuahte kum tawpah deuh chauh man/ seng (harvest) a nih avangin leh dahthatna a awm loh avangin kan eikhawp bak chu state pawna hralh chhuah a ni thin a, chutih rualin kumtluanin state pawn atangin sum tam tak sengin sangha tam tak kan chawlut thin. Chuvangin, Mizoram sangha tharte kan state chhungah tam zawk hralh a nih theih nan kumtawp chauha sangha a ruala seng/man vek loin kumtluana awmze nei leh mumal taka seng /man hun bithliah a ni ang. Mizoram-ah hian sangha khawi theihna ram (potential area) te hi cheibawl a, sangha thar chhuah tipung tura hmalak a ni ang. Kolasib district, Assam ram dep leh Lunglei leh Saiha district Bangladesh ramri hnaia phaizawl kan neihte hi sangha tam zawk thar chhuahna tura cheibawl a ni ang a, hemi lama tuimi te pawh nasa zawka thawhpui leh chhawmdawl an ni ang.

B-2.7 INDUSTRY TIH HMASAWNNA (Industrial Development)
Industry changtlung tak neih hi thalaite hna thawh tur siamsakna tha ber pakhat a ni a, Mizoram erawh chu Industry lamah kan la hnufual hle a, industry atanga thil siam leh thawn chhuah tih tham kan la nei lo a ni. Chuvangin, Mizoram-ah industry tha leh changtlung zawk din tura hma nasa taka lak a ni ang. Thangthar lehkhathiam ten sorkar hna chauh beisei lova industry leh a kaihnawiha hnathawh tur tha an hmuh theih nan tih tak zeta hmalak tum a ni. Tin, Service Sector leh social enterprises (eg. Hotel leh restaurant, film leh music, tourism, Information & Communication Technology etc.) lamah lehkhathiamte tan hna tam tak siam hi MNF Party chuan a tum a ni. Mizoram a Industrial estate leh Industrial growth centre atana hmun hma kan neihsa te hi ti changtlungin thalaite eizawnna leh hnathawhtur siamna atan hman tangkai tum a ni.
Mizoram in Industry lamah nasa zawka hma a sawn theih nan hmalak a ni ang a, Mizoram Industrial Policy kan hman mekte pawh MNF Policy nena inmil turin ennawn a ni ang. Industry lama tuimite an din chhuah theih ngeina turin hmalak a ni ang. Sorkar hna ah mi zawng zawng thun luh theih a nih loh avangin mahni kea dinga eizawnna inkawhhmuh (Entrepreneurship development) lam uar a ni ang. Industry lama hmasawn zel nan kan zirna in neihsa ITI tih changtlun bakah Community college din tum ani ang a, hengah hian thalaite hna hmuh awlsam zawnga zirna (Job-oriented training, skill development, entrepreneurship training) te ruahman pui a ni ang. Thalai lehkha thiam hna nei lo ten mahni a eizawnna an neih theih nan kawng dap pui an ni ang a, helama tuimite tana awmze nei ngei tura buatsaih a ni ang. Tin, bultanna tur nei loten loan an lak theih nan sorkar Guarantor-ah tangin bultanna a ngaihtuahpui ang.
Heng a chunga Industrial Policy ti hlawhtling tur hian hmalakna tur kawng hrang hrang duan a ni a, chungte chu:

B-2.7(i)Agro-based Industries: Mizoram a kan thlai tharchhuahte sawngbawl leh vawnthat (food processing industries) lamah nasa tak a hma lak tum ani. Hemi atang hian Industrial Technology leh food processing technology zirna lamah pawh nasa taka hma lain thalai helama tui mite training tura puih an ni ang.

B-2.7(ii) Forest based Industries: Mau leh thelret (rubber) te, hruihnang (cane), hmunphiah leh herbal industry te hi, kan ram din chhuahna tur pawimawh a nih avangin a sawngbawlna lam ngaih pawimawh ani ang. Thing leh mau sawngbawlna (Wood seasoning & Processing leh bamboo treatment plant) din tum a ni. Tin, Forest Research Laboratory ti changtlungin forest products chi hrang hrangte zirchianna mumal zawk kalpui tum a ni. Plywood leh Plyboard siamna tur kawngte pawh dap a ni ang.

B-2.7(iii) Paper Industry: Mizoram-a thing leh mau kan neih te tangkai zawka hman a nih theih nan Paper leh Hand-made paper Industry din tum a ni. Paper Mill pawh din tura hmalak a ni ang.

B-2.7(iv) Pharmaceutical Industry:
Mizoram a kan thlai leh ramhmul damdawi neih te hmang tangkai a damdawi siamna (Pharmaceutical Industry) din tura hmalak a ni ang. Bangladesh ah hetiang hi hlawhtling taka kalpui mek a ni.

B-2.7(v) Mines and Mineral Industries:
Ram leilung hausakna haichhuak turin hma lak a ni ang. Gas leh Petroluem exploration chung chang ah pawh, ram leilung fate chanvo a tam theih nan hmalak a ni ang. Kan leilung hausakna hai chhuah kawnga Mizo thalai tam zawkin hna an hmuh theih nan hemi lam zirna Degree/ diploma zirna tur te pawh buatsaih a ni ang.

B-2.7(vi) Tourism Industry
Mizoram-ah khualzin (tourists) tam zawk hip lut turin kawng hrang hrangin hmalak a ni ang a, tourism hi thalai lehkhathiam leh hna neilote te tan eizawnna petu a nih theih nan nasa taka hmalak tum a ni. Eco-tourism lam uar a ni ang a, Cultural leh historical site/heritage te humhalh a tourist hipna atan hman a ni ang.

B-2.7(vii) ICT industry:
Information & Communication Technology (ICT) hmasawnna atana ngaih pawimawhte chu Internet Connectivity tha leh chak zawk te, Sorkar office leh mipui ten tun aia tangkai zawka ICT an hman tangkai theina tur te, Private IT Industry din leh IT kaihnawih lam sumdawnna ngaihtuah te, IT/ITES (IT Enabled Services) park siam te, IT industry-te tana Tax chi hrang hrang tih hniam a ni ang.

B-2.8(i) Khawpui miretheite ei zawnna siam sak
Mizoram ah industry dina sumdawnna leh sum peipunna (investment) lamah hmasawnna a awm theih nan huam zau tak, hnam himna ngaihtuah chungin hma lak a ni ang. Ram leilung fate tana him chinah chauh pawn lam mi, Mizorama sumdawnna leh Industry din duhte tan kawng hawn an ni ang. Khawpui daifema Industrial Growth Centre / Complex dinna tura bul tan tawh hi a taka chhawr tangkai a nih ngei theih nan hmalak a ni ang.
Khawpuia awm, ram leh eizawnna mumal neilo ten he scheme hi an hman tangkai ve theih nan ruahmanna siam ani ang. Nitin a inhlawhfa leh chawhmeh zuara eizawngte, kawngsir a tlereuh leh thawmhnaw zuartu te leh eizawnna nghet neilote dawmkanna tur (Special Development Scheme) ruahman tum ani. Chutiangin Aizawl leh district khawpui danga mirethei leh harsa zawk, lo leh huan nei lote tan eizawnna ngelnghet leh dinchhuahpui tham (Small and medium Enterprises) ngaihtuah sak tum a ni.

B-2.8(ii) Kuthnathawktute Insurance Scheme
Mizoram-a kuthnathawktu chi hrang hrangten vanduai vanga thlai / ranvulh an chan palhin chhawmdawlna (Crop Insurance scheme/ Micro Insurance Scheme) ruahman sak an ni ang. Tin, National Family Benefit Scheme leh Workers Welfare Scheme hnuaiah kuthnathawktu chhungkuaa eizawngtu ber a boral emaw ram tui lei loa a awm palh in a chhungte chhawmdawlna chhenfakawm zawk pek an ni ang. Attal Pension Yojana (APY) te, PM Joyti Jeevan Yojana (PMJJY) leh PM Suraksha Bima Yojana (PMSBY) leh SBI hnuaia Group Insurance Scheme-te pawh hmang turin hmalak a ni ang.

B-2.8(iii) Mipui mamawh hniang hnar zawka pek
Kan nitin mamawh zualpui (basic needs) heng – Electric Power Supply, Tui (Water Supply), eirawngbawlna Gas (LPG), ration buhfai leh chini etc. mipuite’n hnianghnara an hmuh reng theih nan theihtawpa hmalak tum a ni. Tin, mipuiten hnianghnara LPG an hmuh theih nan Company atanga Agent leh Mipuite hnen a thlenna kawnga harsatna awm te zir chiangin kalphung tha leh felfai siam tum a ni.

B-2.8(iv) Oil Depot / Gas Depot lian siam:
Vawiin thlenga Mizoram harsatna lian tak chu Oil leh Gas kan tlachham thin hi a ni a. Kawng ping, Bandh, leh suahsual rawngbawl thenkhat te avangin a ram pum anga repchar kan ni thuai thin. Hei hi a chhan lian tak chu Oil & Gas Depot lian min chawm zo tur kan neih loh vang a ni. Hemi pumpelh nan hian State dang te neih ang Oil & Gas Depot lian Mizoramah ngei siam tum a ni ang. Gas leh Oil kawng laka chingpen nasa lutuk hi titawp tura hmalak a ni ang.

B-2.8(v) Thalaite hnathawhtur ngaihtuahpui
Thalai lehkhathiam hna hmu lo te tan Unemployment Allowance siam tum a ni. Tin, thalai lehkhathian hna hmu lote tan an tui zawng eizawnna atana mahni a bul an tan na tur (Assistance for Educated Youth in Bussiness/Entrepreneurship) ngaihtuahsak an ni ang. Hemi atan hian Financial Institutions leh Nationalized Banks te tun aia tangkai zawka chhawr dan sorkar in a ngaihtuah ang.

B-2.9 HMASAWNNA RUHREL DIN
(Infrastructure Development)

Mizoram hi chhan hrang hrang avangin hmasawnna rulrel (infrastructure) pawimawh- khawmual, tui leh boruaka inkalpawhna, kawlphetha siamchhuahna, tui hnianghnara lakna lamah kan la hnufum hle a ni. Heng hmasawnna ruhrelte tello chuan ramin ei leh barah hma a sawn chak thei lo tih hriain MNF sorkar laiin theihtawp chhuahin kawngpui sial hna thawh alo ni tawh a; Aizawl – Lunglei NH kawngpui sial bakah Mizoram hmun hrang hrangah Agriculture Link Road leh Bamboo Link Road siam ani bawk. Tin, Lengpui Airport din na leh Mizoram-a Rail kawng sialna turin hma alo la tawh a. Heng bakah hian Aizawl khawpui leh a chhehvela hmun pawimawh-Millenium Centre, New Capital Complex te, Aizawl khawpui daifema truck terminals hrang te, Greater Aizawl Water Supply Scheme (Phase-II) te, Bawngkawn-Durtlang kawng te hi MNF sorkar laia siam an ni a; tin, MNF sorkar laiin Assam Rifles sawnchhuak tura nasa taka hma lo la tawhin Zokhawsang-a an awmna hmun tur pawh ruahmanna siam tawh a ni. Heng bakah hian Mizoram khawpui hrang hrangah Bazar building leh Sorkar Office Complex thahnem tak sak alo ni tawh bawk. Mizoram chhim leh hmar, chhak leh thlang huapa hmasawnna ruhrel din tur hian MNF party chuan hmachhawp thahnem tak a la nei a, chungte ti hlawhtling tur chuan theihtawp chhuah zel a tum a, chung zinga pawimawh zualte chu:

B-2.9(i) Transport & Communication Infrastructure :
India sorkar ‘Act East Policy’ zulzuiin Mizoram chhim leh hmar, chhak leh thlang kal tlanga ramdang kal pawhna tur kawngpui sial tum a ni a, Bangladesh atanga Myanmar thleng kawngpui tha tak sial a ni ang.
Mizoram chhim lamah Airport siam tum a ni a, Mizoram district hrang hrangah helicopter tum hmun (Helipad) tam zawk siam a ni ang. Mizoram-a rail rawn lut hian ram lairil zawk a pawh theih nan hma lak a ni ang. Kan ram lui lian te bungrua leh mihring kal vel nan a tul lai te siam thain kan lui liante tangkai zawk a hman a ni ang. Mizoram khaw tinin inbiakpawhna tha zawk an neih theihnan hmalak a ni ang.

B-2.9 (ii) Leiverh siam lama hmalakna:
Inkalpawhna ruhrel changtlung leh awlsam zawk a awm theih nan Mizoram hmun remchang laiah te ‘Leiverh’ hmanga kawng siam tum a ni ang. Central Sorkar-ah Project lian siamin funding agency liante thawhpui a hmalak tum a ni.
B-2.9(iii) Rope Way siam lama tanlakna tur:
Mizoram pianhmang (terrain) hi ram chhengchhia leh tlangram tamna anih avangin hemi mil tak tur Rope Way communication siam hi tul hle a, hei hian Tourism Industry nasa taka a tihhmasawn theih a beiseiawm avangin helamah hian nasa zawka hmalakna a ni ang. Tin, Rope-way hi khawpui cheina, inkalpawhna leh tihhausakna atan a tangkai hle dawn avangin hmun remchang lai te zirchiangin a tam thei ang ber siam tum a ni.

B-2.9(iv) District inkal pawhna kawngpui siam
Mizoram chhim leh hmar, chhak leh thlang, District khawpui hrang hrangte inkalpawhna kawngpui tha tawk lo hi a siam that vek a ni ang. A bik takin kan kawngpui chhim leh hmar hawi zawnga kal te a zia awm tawh viau laiin khawchhak leh thlang hawi zawng (East to West Corridor) a kal kan nei tha lo viau thung; chuvangin, Mizoram chhak leh thlang in kal pawhna tha zawk sial a ni ang.

B-2.9(v) Thingtlang khua inkalpawhna (Rural Road / Economic Road)
MNF sorkar hmasa in thingtlang khaw hrang hrangte in kalpawhna a lo laih tawh te tha zawka chei tum a ni. Tin, kawng (Link Road) zawh fel loh leh hman tangkai loha awmte chei thar a ni ang.Tin, kan ram luidung ram tha, kawng mumal awm loh avanga hman tangkai tawk loh tam tak a awm a. Buh leh bal leh thlai tam zawk kan tharchhuah theih nan te, thing leh mau leh tiau balu etc. awlsam zawk kan lak chhuah theih nan te kawng awmsa siam that leh kawng thar laih te hi kan hmachhawp pawimawh a ni ang.

B-2.9(vi) Khawpui hrang hrangte tih changtlun (Development of Urban Infrastructure)
Kan khawpuite hi plan mumal awm lova lo thanglian te an nih hlawm avangin mipui pung zelah kawng tinrengin harsatna kan tawk mek a. Kawngpui siam that te, kawng chhawng (elevated road) siam te, hmun remchang laia fly-over tam zawk siamte, tui supply tha zawk kan neih theih nana nasa zawka hmathar lak te, bawlhlawh sawngbawlna tha leh tuiluankawr (drainage) siam te chu hmalakna tur pawimawh an ni ang.

B-2.9(vii) Khawpui Boruak thianghlim nana hmalak (Urban Green Infrastructure)
Khawpuiah boruak tha leh thianghlim zawk kan neih theih nan khawpui chhung leh a chheh velah thingphun leh ngaw (urban forestry) siam uar a ni ang; tin, inhmun / huan ram atan a hman tlak loh hmun awih leh kham chhengchhe lai te hemi atan hian hman tangkai theih a ni. Hmun remchang laiah green park te, sorkar office leh zirna in compound ah hmun hring leh mawi (green space) te uar a ni ang.

B-2.9(viii) Conference Centre leh Local Council House tam zawk din :
Mizote hi inkhawmpui lian tak tak nei thin kan ni a. Hetiang hunah hian sorkar hmun leh bungrua te nasa takin kan hmang thin a. Chuvangin Conference Centre lian tak, mipui tam tak lenna tur siam a ni ang. Tin, khawpui chhunga roreltu (Urban Local Bodies) tih chak nan leh fel zawka hna an thawh theih nan khawpui chhunga veng hrang hrangah Local Council House / Office sak tum a ni ang a, hei hi village / local information centre atan hman nghal theih a ni bawk ang.

B-2.9(ix) Aizawl khawpui tihchangtlunna (Aizawl City Improvement Plan) :
Aizawl khawpui luhna leh chhuahka hi mihring leh lirthei pung zelah a tawtin chet vel a harsa ta hle a, chuvangin Aizawl khawpui luh-chhuahna leh helna kawng (Aizawl entry / exit / by-pass road) hetiang hian siam belh tum a ni.
* NH-54-Durlui-Selesih-Muthi-Zemabawk: Silchar atanga Champhai tlangdung leh Serchhip tlangdung pan tur ten Aizawl luh kher ngai lovin an kal thei ang.

* Sihhmui-MZU hnuai- Reiek Road-Hlimen-Samtlang-Hualngohmun-Melriat: Silchar atanga Sialsuk-Lunglei tlangdung kal tur tan Aizawl khawpui lut kherlova in kalpawhna ruahman a ni ang..

* Aizawl luhka (entry routes): Traffic jam, leimin leh quarry chim vanga harsatna awm thinte a lo ziaawm theih nan Aizawl to Lengpui luhka bakah Chhim-hmar-chhaka Aizawl luhka tur kawng dang pahnih tal sial belh tum a ni.

* Assam Rifles chhuahsan ram cheibawl: AR sawn chhuak tura hmalak chhunzawm a ni ang a, an chhuahsan ram hi mipui vantlang tana tha leh tangkai thei ang ber tura cheibawl a ni ang.

* Aizawl khawpui chhunga Traffic Jam nasat na lai hmun remchangah te Fly-over leh motor dahkhawmna (parking)tam zawk siam a ni ang:

B-2.9 (x) Aizawl khawpui atana ruahmanna siam: Aizawl khawpui tawt leh bit em em hian harsatna tam tak min siam bakah rikrum thulhah a hlauhawm bawk a. Khawpui tawt lutuk tihziaawm nan leh khawpui zauhna atan ruahmanna mumal tak siam tum a ni. Tin, Mizoram-a kan khawpui dang te pawh a tul ang zela chei leh tihhmasawn tum a ni ang.

B-2.10 KAWLPHETHA SIAM CHHUAH (Power & Electricity Infrastructure)
Ram changkanna leh hmasawnna bulpui chu ‘Kawlphetha’ hi a ni kan ti thei awm e. Mizoram in Power & Electricity-a kan intodelh theih nan kawng hrang hranga tan lak tum a ni a, kum 2030-ah chuan Mizoram hi Power a intodelh bakah thawnchhuah tham nei turin hmalak tum a ni. Chung atan chuan Project lian heng – Hydel Power Project te, Natural Gas atanga power siam chhuah (Natural Gas-based Thermal Plant) te bakah hun reilo zawka tih hlawhtlin theih (short term project) leh India sorkar pawhin a tui pui – Ni zung leh thli chakna (solar leh wind energy) hmanga power siam chhuah lamah tan lak tum a ni ang. Tin, Ni zung leh thli chakna (solar leh wind energy) hmangkawp thei power plant (solar-wind hybrid technology) te pawh Sorkar office, zirna in, leh mimal in te tan pawh tangkai zawka hman dan ngaihtuah a ni ang. Tin, Mizoram a electric la nei lo khua te eng pek vek tum a ni a, tin chhungtin te electric eng pek tum a ni bawk.

B-2.11 Hmasawnna ruhrel enkawl (Infrastructure Management System)
Hmasawnna ruhrel tha leh tlo nei turin ruahmanna mumal tak siam a ni ang a, vantlang leh sorkar hmunhma te tha zawka enkawl zui dan tur a hnuaia mi ang hian ruahmanna siam tum a ni. Hemi atan hian Line Department leh VC-te thawhhona (Co-ordination Committee) siam a ni ang.

B-2.11(i) Sorkar department thawh hona tha siam (Integrated Approach) A bik takin khawpui hmasawnna (Urban Infrastructure) hnathawh leh enkawlnaah hian thawh hona (co-ordination) tha neih a tul a. Infrastructure hrang hrangte siamtu department hrang hrang an nih avangin hnathawh insu buai tam tak kan hmu fo, entirnan, PWD in kawng an siam (resurface) zo hlawt a, PHE in an rawn lai chhe leh fo. Hei vang hian sum leh hun tam tak kan khawhral bakah mipui tan harsatna a siam thin. Chuvangin, Department hrang hrangte hmalak dan (annual work plan) en ho a, hnathawh dan tur mumal siamrem dan ngaihtuah a ni ang.

B-2.11(ii) Vantlang thil enkawl (Maitenance of Public Asets):
Hmasawnna ruhrel kan siam te (e.g. kawng laih leh siam, lei dawh, flyover siam, etc) siam dan (work management and quality) ah mipuite duhthu a sam lo fo. Chumi piah lamah a enkawl mumal kan nei loh vangin hnathawh zawh tawh si, a neitu awm ta lo ang maia hlamchhiah kan ngah hle. Contract hnate hi hna thawh dan azir (performance based contract) a pein, hnathawh man (work bill) pawh an thawh dan mila pein, thawk tha lo leh a hun a zo thei lo te chunga action lak thin tum a ni. Chuvangin, vantlang hmunhma leh thil tangkai siam (Work supervision and monitoring) leh a enkawl zuina (maintenance) kawngah sorkar department kuta engkim dah lovin mipui / khawtlang kutah mawhphurhna tam zawk pek a ni ang. Khaw tinah Public Property Management Committee din tum a ni ang.

B-2.11(iii) Vantlang ram humhalh leh enkawl:
Khawtlang ro leh hmunhma (Infrastructure) kan neihsa tih changtlun emaw, a thar siamna kawngah kan ram hian harsatna kan tawk tam hle a. Kan kawngpuite hi roadside reserve pawh nei lo ang mai an ni a. Chutih laiin sorkar ram hi mimal leh pawl ten an nek nasa hle si. Kan khawpui te a tawt tial tial a, hmathar lakna turah harsatna kan insiam nasa hle a ni. Chuvangin, vantlang ram humhalh leh mumal taka enkawl tum a ni.

B-2.12 Environment humhalh leh enkawl
( Environmental conservation)
Mizoram a ramngaw leh a chhunga cheng ramsa leh nungchate humhalhna ngaihpawimawh a ni ang a, hemi kawngah hian tlawmngai pawlte nasa zawka thawpui an ni ang. Kan leilung chhe mek humhalh te, tui leh tuihna humhalh te, tui leh boruak bawlhlawh (air and water pollution) zual zel tur ven kawngah te nasa zawka hmalak tum a ni. Reverine Forest Reserve hi dik taka kenkawh tum a ni ang.

B-2.13 Construction Corporation din:
Tuna kan dinhmunah hian kawngpui (highways) siam, lei (bridge) lian siam leh building lian zawng zawng sak hna hi a ram miten chang lovin state pawn lam mi (Public & provate company) ten an thawk vek a, a hlawkna pawh state pawn lamah a chhuak vek zel a, a ram mi ten chan kan nei tlem em em a ni. Mizoram PWD hnuaia Contractor te hi hna lian tham eg. Highway tender etc. chhang tura an qualify loh avangin State pawn lam contractor hlirin hna an thawk a, hna a muangin kawng chhia a tam em em a ni. He harsatna su kiang tur hian Construction Corporation lian, state chhunga hna (construction work) lian te thawk thei tur din a ni ang. He corporation ah hian Mizo thalai lehkhathiam te tan hna hmuhna remchang a awm thei dawn a ni. Tin, kan rama contractor hna nei lova rei tak tak awm thinte hian he Construction Company hnuaiah hian Sub-contract a thawh tur hna tam zawk an hmu thei ang.

B-2.14 Mizoram PWD Manual:
Kan ram leilung awmdan (topography) leh sik leh sa (climate) nena in mila hnathawh anih theih nan te, hna tha zawk leh chak zawka thawh a nih theih nan leh a ram mite chanvo humhalhna atan Mizoram PWD Manual siam a ni ang.

B-2.15 Sum lo luan luh nana pawn lam mi hip luh (Creation of Trade & Investment Environment for Outside Investors)
Mizoramah pawn lam mi te tana sumdawnna (investment) tha leh phurawm a awm theih nan hnam himna ngaihtuah chungin nasa zawka hmalak a ni ang. Sumdawnna leh hmasawnna hna thawhna atan ‘Invest in Mizoram’ policy hman a ni ang a, kan ram leilung nena inmil industry din turin state pawn lam atangin National leh Multi-National Company te’n Mizoram a sumdawnna (investment) an tih theihna kawng zawn a ni ang.

B-3 SOCIAL DEVELOPMENT POLICY
(Mipui Vantlang Nun Tihhmasawn)
He policy hnuaiah hian zoram mipuite lungawina leh hlimna ngaihtuah te, hriselna leh thianghlimna (health & sanitation) tha te, pawikhawihna leh suahsualna (crime rate) tihhniam te, rilru hrisel (public morality) ngaihtuah te, a tawi zawngin vantlang mamawh leh hmasawnna hrang hrang (community improvement programmmes) leh mihring thiamna leh thiamna tihpun leh hman tangkai te ngaihpawimawh a ni ang.
Vantlang nun nuam leh hmasawn zawnga a kal theih nan, ruahmanna tha siam turin he Policy hnuaiah hian nasa taka hmalak a ni ang. Chung Policy-in a huam thenkhat chu – khawlai chep lutuk ven te, vantlang tana insak dan mumal zawk te, tui in tur inpek dan tha zawk te, tuichhe luanna mumal siam dan te, hriselna leh thianghlimna mitin vawn tur inkawhhmuh te, Cultural items leh Recreational centre siam te, vantlang inthiarna tha siam te a ni. Tin, heng bakah hian vantlang mamawh health centre te, thlanmual intawm tur siam te, mobile clinic te, intihhlimna hmun te, infiamna hmun te, Information Technology common service centre te, Wifi transmission leh vantlang intawm tur pawimawh te ngaihtuah a huam a ni. (Programme detail Appendix ah dah a ni).

B-3.1 Man-Power Development Policy (MDP)
Mizo fate hi siamtu Pathianin hnam danglam tak, theihna leh thiamna (dynamic nature) sang tak neiin min siam a. Pathian hnam thlan Israelte ang maiin kan thiltih leh kan hawina lamah reng reng chuan mite mak tih khawpa thiamna leh theihna nei sang tak nei hnam kan ni. Pianphung danglam tak, thiltihtheihna leh ropui rukna tam tak kawl, kawlhrawng (adventurous) em em, thil mawi leh nalh hre tak, thil duh uluk tak, zaithiam em em, tlawmngai, huaisen leh changkang (civilized) tak hnam kan ni.
He kan pianpui finna leh theihna (inborn skills and knowledges) hi awmze neia kan kalpui phawt chuan kan ram hausakna thurukah a chang thei dawn a. Khawvel finna leh thiamna thang zelah pawh hmathlir eng tak min pe theitu an ni dawn a ni. Heng kan finna leh thiamnate hi mumal taka hman tangkai (manage or professionalize) anih hun chuan India ram leh khawvela hnam langsar tak kan ni thei dawn a ni. Heng mihring thiamna hman tangkaina Policy hi a tawi zawngin Manpower Development Policy vuah a ni.
Mizo mipuite thiamna leh theihnate hrechiangin MNF Party chuan he Policy hi nasa taka kalpui a tum a ni.

B-3.2 MDP Kalpui Dan Tur
B-3.2 (i) Thiamna leh Theihnate hriatchian (Identification of Potent Embedded Skills):
He Policy bultanna atan chuan Talent kan neih thatnate hriatchian (identify) tum a ni ang. He policy in a tum bulpui ber chu thiamna leh theihna kan neihte hna leh sum leh paia chantir (professionalize) leh management system mumal tak siam a ni. Heng atana kan raw material tur hriat hmasak hi kan bul tanna tur a ni.

B-3.2(ii) Hausakpui tham Talent kan neihte (Potential Key Growth Resources):
Tun dinhmun a talent kan kawl nasatna leh sumdawnna (market) khawvela zuanluhpui tham ni a langte chu-
B-3.2(iii) Zirna (Education): Tun dinhmunah hian India rama ziak leh chhiar thiam tamna ber state pathumna hauh mektu kan ni a. Za zelah 91.33(Economic Times, the 25th. November, 2014) kan hauh mek a ni. Zirna lama kan hmasawnna hi kan intodelhna atan leh hmathlir eng tak min petu hmanraw pawimawh tak a ni thei dawn a ni.

B-3.2(iv) Infiamna (Sports) lamah :
Mizoram thalai ten infiamna khawvela hlawhtlinpui tham thiamna leh theihna kan kawlte hi Sports discipline hrang hrangah kan pho lang mek a. Chung zingah chuan kan piahphung leh ruangamin a mil zual heng – Football, Table Tennis, Lawn Tennis, Combat Sports, Weightlifting, Archery, Shooting, Motor sports leh Adventure sports ah te hlawhtlin theihna kan nei tih kan lan tir mek a, India ram leh khawvel huapin lawman chhuanawm tak tak kan la nual tawh a ni. Tin, infiamna thenkhatah chuan tualchhung inelna (domestic league) mumal tak kalpui mekte kan nei ta bawk a, kan pianphung leh rilru puthmang enin heng kan sawi bakah hian theihna (potential) tam tak kan neih te tihhmasawn tum a ni.

B-3.2(v) Nursing lamah:
Kan nula leh tlangvalte hi pianphungah hmeltha leh zei an nih avangin Nursing lamah hian an hlawhtling mek a. Tunah hian India rama damdawiin lian heng – AIIMS, APOLLO leh Institutes hrang hrangah pawh kohna an dawng nasa em em a ni. Foreign a nurse hna thawk mek hi thahnem tak kan nei bawk a. Tun dinhmun a India rama nurse tha ber chu kan nula leh tlangvalte an ni.

B-3.2(vi) Designing and Fashion Technology lamah:
Pian phunga changkang tak (civilized) leh mit fing tak, thil mawi hre em em, pipu chenah kut themthiam tak kan nih avangin khawvel pum a Fashion Industry hlawk em emah hian dinchhuahna chance kan nei sang hle. Tun maia kan Designer te pawh hi anmahni tuina leh thiamna nen mai pawh hian khawvel huapa zahpuiawm loh tak kuthnu an siam thei zel a ni. Heng kan skills kawl te hi International Market nen kan thlunzawm hun chuan hausakna tham a tling ngei ang.

B-3.2(vii) Music:
Mizote hi rimawi ngaina tak hnam kan ni. Tin, kan ram hian khuarel music (natural music) min pe nasa em em a; sava hram, thereng hram, tuiluang ri, nungcha hrang hrang hram ri, etc avangin rimawia phurna (musical inspirations) kan nei nasa em em a ni. Musical Instruments pawh kan khawih thiam em em bawk a. National level inelna sang heng, Hornbill Festival, IITs, NITs, IIMs leh Universities level competitions-ah pawh thiamber lawman kan la nasa em em a ni. A dik tak chuan a hnam pum anga thlirin India ramah hian mizote aia zaithiam hnam an awm miah lo. Zai leh rimawi hi kan hnama bet tlat a ni a tih theih. Tin, zaipawl (Choir) phei chu keini aia uar leh hlawhtlinpui hnam hi an awm kher lovang. Hetah pawh hian dinchhuahpui tham theihna chu kan kawl a ni. A tihpun leh sum leh paia chantir erawh policy maker te tana challenge lian tak chu a ni.

B-3.2(viii) Fine Arts:
Fine Arts tam tak huam chhunga mi, tuna kan uar zingah kan hnam lam leh incheina neihte (traditional dress) hi a mawi danglam em em hlawm a. Olympic-a India Contingent te parade na a hak hial pawh a lo ni tawh a ni. Kan hnam lam, “Cheraw” (Bamboo Dance) phei chu India ram mai nilo khawvel hriat hial ni tawh in, Guinness World Record (a ruala Cheraw kan tam ber) pawh kan lo siam tawh a ni. Heng kan Arts te hi khawvel market-ah kan phochhuah hun chuan hausakpui tham a ni dawn a ni.

B-3.2(ix) Hospitality & Tourism Management:
Kan sawi tawh angin kan hnam zia hi hawihhawm, tlawmngai, leh changkang tak (civilized) kan nih avangin Tourist te lo dawnsawn thiamna (hospitality) leh puipunna buatsaih (event management) lama theihna kan kawl a ni.

B-3.2(x) Eco-Tourism & Adventure-Tourism Management: Ram mawi tak (Beautiful Terrain) leh ramngaw hring tha tak (Virgin Forest), sik leh sa nuam em em ram kan neih bawk avangin, Tourist-te hip turin theihna leh chakna (potential resources) kan nei tha hle a ni. Tin, Adventure lama tuite hipna tur hmun entirnan, tracking-na hmun tur tha, White Water Rafting tih theihna tur Suar khawkrawk te, Para-Gliding tihna tur Tlang tohlawt (Mountain Cliff) te, Puk hmingthang leh danglam te, Sanctuary, nungcha khawvel hmun danga awm ve lo leh vang tak te tlawh tur te, etc. kan nei tha hle.
B-3.2(xi) Skills Development:
Kan hnam hi pipute atangin kut themthiam tak hnam kan ni. Kan thiam hnang te, thuam thilte hi tunlai hun pawha mawi leh hmuhnawm tham a tam em em a ni. Amaherawhchu, heng promote na tur Zirna in (Institute) tha te, hmanraw tha (infrastructural facility) te kan neih loh avangin tun dinhmunah chuan a ropui tur angin kan lansarhpui lo mai niin a lang.
Tin, kan sawi tak theihna leh thiam bikna(talent &skills) kan neihsa piah lamah kan thiamna leh theihna la phochhuah loh tam tak phochhuak theihna tur programme hrang hrang pawh ngaihtuah a ni ang.
Heng kan sawi lan tak leh sawi lan loh tam tak (potential resources) neihte hi mumal taka hman tangkai leh hna ngelnghet a chantir (professionalize) hi Man Power Development Policy tum bulpui ber chu a ni.

B-3.3 MDP atana ruhrel din tura ruahmanna
(Strategy for Infrastructure Development)
B-3.3(i) Manpower Department Din (Creation of Directorate of Manpower):
MNF sorkar lai (2003) khan thalaite hmakhua thlirin Mizoram Youth Commission (MYC) din a ni a. Mahse Sorkarna te a lo inthlak avang leh ruahmanna that tawk loh avangin tun thleng hian a nih tur ang ni pha lovin, a huam a zim hle a. chuvang chuan a aia lian zawk leh huam zau zawkin ram changkang zawkte tih angin ‘Manpower Directorate’ din a ni ang. Chu chuan mihring thiamna (skills) tihpun leh hlawkpui hna a thawk ang. Mumal taka ‘Channel’ siamin Sorkar Department dangte angin Budget leh Fund allocation te pawh dah a ni ang. Kal dan mumal leh inawpdan (administrative bill) chu Assembly House a siam (legislate) a ni ang a, mithiamte rawn chungin mumal taka kalpui dan tur siam a ni ang.
B-3.3(ii) Mizoram Institute of Fashion Technology Din
( Establishment of Mizoram Institute of Fashion Technology-MIFT):
Fashion Industry lama kan than theihna turin zirna in changtlung tak ‘MIFT’ (Mizoram Institute of Fashion Technology) din a ni ang. A remchan dan anga NIFT (National Institute of Fashion Technology) a in affiliate emaw collaborate a ni ang. University a in affiliate in zirlaite pawh degree pek an ni ang. Mithiam tam tak hna siamna leh thalaite thawh tur( Employment generate) tha tak a ni dawn a ni. Course tha tak tak heng – Garment, Embroidery, Design, Pottery, Sculpture, etc lamah te hmalak a ni ang.

B-3.3(iii) Mizoram Institute of Skills Development and Entrepreneurship Training Din (Establishment of Mizoram Institute of Skills Development and Entrepreneurship Training – MISDET):
Hna hniam ber atanga sang ber thawk thei tura inbuatsaihna tur leh mahni ke a ding thei tura kutthemthiamna (skills Development), zirna leh sumdawnna (Entrepreneurship) bultan dan inzirtirna Institute din a ni ang. ITIs leh Polytechnics te nen inhnek remtir a ni ang a, non-formal education leh formal education nen inmilin degree pawh pek tum an ni ang. National Council for Skills Development nen curriculum poh inzawm a siam a ni ang.
Tunlai hian kan thalai tam tak te inhlawhfain Foreign ram (Singapore, Saudi Arabia, Qatar, Malaysia, Macau, etc) leh India ram chhungah an chhuak nasa hle a. Hengte hi mumal zawka kalpui (channelize) anih theihna atan leh himna (security) sang zawk a thalaite an chhuah theih nan he institute-ah hian training an nei thin ang. Tin, a tul ang zelin sorkarin Passport leh VISA te a ngaihtuah ang. Tin, he institute hian ramchhung leh Foreign a Agency hrang hrang a thawhpui ang a, thalaite tan hna a tam thei ang ber a ngaihtuah ang.

B-3.3(iv) Mizoram Institute of Music and Fine Arts Din (Establishment of Mizoram Institute of Music and Fine Arts – MIMFA):
Kan Musical skills tehna a chantir (professionalize) turin Mizoram Institute of Fine Music and Fine Arts (MIMFA) din a ni ang. Formal education curriculum chhungah dahin Educational degree tlukpui (Equivalent) pek a ni ang. Ramchhung leh ram pawn a Institute te nen intlunzawmin thiamna inchhimtawnna (idea exchange programme) siamin hna pawh ngaihtuah a ni ang. Tin, a remchan dan ang zela khawvel institute lar leh mithiamte pawh rawih (outsource) an ni thin ang.

B-3.3(v) Motor / Bike / Bicycle Intlansiakna Hmun Siam(Construction of Racing Circuit / Race Track):
Tun dinhmuna Mizo Thalaite tuihalna ber pakhat chu an Motor / Bike tha takte pholanna hmun leh intlansiakna hmun (Race Track) an neilo hi a ni. Tin, Cycle Racing lam pawh hi kan uar chho mek bawk. Kan khawpui tawt takah hian thalaite thawk lakna tur hmun leh heng an thiamthil an phochhuahna hmun a awmloh avangin, Racing lamah hian kan hmasawn tur angin hma kan sawn lo a ni.
Heng Thalaite tuihalna tireh tur hian Race Track / Race Circuit National Level buatsaih tum a ni ang. Tin, hei hian thalaite hmakhua leh remchanna (opportunity) nasa taka a siam sak dawn bakah, an skills neihte nasa takin hna leh sum leh paiah a chantir thei dawn a ni.

B-3.3(vi) Sports Training-na hmun leh Multi-Sports Complex Buatsaih (Introduction of Sports Training Facilities): He programme hnuaiah hian Sports discipline hrang hrang ah te Sports facility tha leh changtlung tak buatsaih a ni ang. Tin, heng a programme kan kalpuite hi National leh International a sports authority nen inthlunzawma thawh hona (collaborate) an ni ang. (FIFA, SAI, etc). Tin, sum Funding system tha nei turin Sorkar laipuiin scheme a neihte a tam thei ang ber hman tangkai (access) a ni ang a. Multi National Company ten Sponsorships atana budget allocation an dah thin te atam thei ang ber Sports Associations leh Clubs te tan huiluh sak an ni ang (Heng company te hian sporsorships head atan hian 5% of their budget an dah thin).

B-3.3(vii) Khualzin hip tur hmun Siam (Creation of Tourist Hot-Spots):
Tourism Industry hi a hlawk avangin Khawvel ram tam tak hian hausakpuina atan an hmang nasa em em a. Keini pawhin kan ram mawina (natural beauty) leh ram pianhmang danglam (diverse terrain) leh sik leh sa nuam em em (Favourable Climatic condition), leh mihring hawihhawm tak chenna hmun kan neih avangin khualzinte tlawh duh tak ramah siam kan tum dawn a ni. Chung an tlawh duh tur hmunte pawh chu a bik taka cheibawl a ni ang. Entirnan, Lengpui Airport an rawn tumna atang emaw Aizawl khawpui chhung atanga Helicopter service siamin, Phawngpui tlang leh hmun nuam dang reh leh mawi taka hruaina tur hmun siam te, kan lui khawkrawk tak tak a Boating / Rafting tih theihna te, Para Gliding tih theihna hmun siamte kan tum dawn a ni. Hmun thenkhatah chuan Pangpar hmun (Flower garden) te, Intihhlimna Park (Amusement Park) te, siam a ni ang. Heng khualzinte uluk leh zei taka lo ‘welcome’ tur leh kaihruai tu (Guide) turin thalai lehkhathiam, Tourism leh Hospitality lama thiamna neite chhawr tangkai an ni ang.

B-3.3(viii) Medicinal / Herbal Research Centre Din(Establishment of Herbal Research Centre):
Kan ramah hian ‘Ramhmul Damdawi’ tam tak kan nei a. Heng kan damdawi hlu tak takte hi sum leh pai a chantir turin Herbal Research Centre kan din ang. Hengah hian thalai lehkhathiam leh thiam lo pawh tam tak chhawr theih an ni dawn a. State sum hnar tha tak a tling thei dawn a ni. Company lian leh mithiamte thawhpuiin a siamchhuah dan leh Medicinal value (hlutna) te zirchiangin thalai lehkhathiam tam tak he Research-ah hian an bung thei dawn a ni. Heng atanga kan thil siamchhuahte hi Damdawi In lian leh State dang leh International Market a kan thawnchhuah theih tur hlawk tak a ni thei dawn a ni.

B-3.3(ix) Mizoram Bamboo Mission and Craftmanships Training Centre din (Establishment of Mizoram Bamboo Mission and Craftmanships Training Centre):
Kan rama mau / rua te sawngbawlna hmun leh Mau/Rua atanga thiamthil siamchhuahna hmun kan siam ang. Hei hian khawvel Company lian leh National company te thawhpuiin thalai hna tam tak a pe thei dawn a. A remchan dan ang zelin National Institute of Fashion Technology te (NIFT) te, Indian Institute of Technology (IITs) Design Department te, leh National Bamboo Mission te nen thawkho in hna tam tak siam a ni ang. Tin, heta tanga product te pawh Market nen mumal taka thlun zawm (link) tura hmalak a ni ang. Kan product te tihral leh market chungchang buaipui turin IIMs te nen thawhho tum a ni bawk ang.

B-3.3(x) Mizoram Techno-Park Din (Creation of Mizoram Techno-Park):
Mizo Thalaite kutthemthiamna leh thil siamchhuahte internet kaltlanga an zawrh theihna tur, khawvel hmun hrang hrang a mithiamte nen an ngaihdan leh tuizawngte an in chhimtawn (share) theihna tur Techno-Park siam a ni ang. Hemi kaltlang hian sum leh pai tam tak kan ramah a lo luang lut thei dawn a ni.

B-3.4 MIZORAM NEW EDUCATION POLICY (MNEP)
Ram leh hnam dinchhuahna leh tlukchiatna hi Zirna-ah a innghah thuk em avangin hnam naupang Mizote hian zirna tha tluantling (Sustainable education) kan neih a tul takzet a ni. Ram changkanna bulthut chu zirna hi a ni. Chu zirna tha tluantling nei tur chuan a bulthut atanga hrilhfiahna leh chianna (conceptual clarity) a nei tha tur a ni. Hnam rohlu leh ziarang vawn nunna leh khawvel changkang zelah chona thar hmachhawn tura buatsaihtu atan zirna tha kan mamawh a ni. Tin, hun leh hmun a danglam thin angin zirnain a huam chin (scope of education) pawh tih hausak emaw tih zau a tul thin. Zirna chu thiamna leh finna (wisdom) kan neihna mai piah lamah hna leh sum leh paiah chantir (professionalize) a tul bawk. Zirna chu ei leh bara intodelhna hmanraw pawimawh tak a ni tur a ni. Mihring inlaichinna vawngtu (service to humanity), taksa, rilru leh thlarau hriselna hmanraw pawimawh ber nih hi zirna bulthut chu a ni.
Mizorama zirna siamtha turin MNF chuan a hnuaia tarlan ang Mizoram New Education Policy (MNEP) a kalpui dawn a ni.

B-3.4(i) New Education Policy (NEP):
Central Sorkarin a kalpui zulzuia kan education siamthat a ni ang. National Standard Education nei pha turin tan lak a ni anga, chumi atan chuan Kohhran leh private institutions te nen tangkawpa hma lak a ni ang. SCERT hi tangkai zawka chhawrin National level curriculum siam a ni ang.

B-3.4(ii) New Education Commission:
Mizoram a zirnain awmze nei zawka hma a sawn theih nan leh kan kalphung tha lo laite zirchian leh siamthat na atan New Education Commission din a ni ang.

B-3.4(iii) Ngaihhlut tur dik inzirtir (Value-based education) Mizoram education hi ‘Value-based Education’ a chan tir kan tum ang. Chumi awmzia chu kan zirna hi sakhaw tihbik neilo leh zirtirna awnbik neilo (value-neutral) ni lovin kan sakhua leh hnam nun zirtirna laipuia hmang zirna kan siam dawn a ni. Kan khawtlang nun chhe mek siamthat nan nundan tha leh mawi (Manner and etiquette), faina nun pui, Zonunmawi tlawmngaihna leh kan sakhaw zirtirnate bakah ram leh hnam hmangaihna (patriotism / nationalism) kan vawn nun theihna turin Mizo history leh hnam pasalthate chanchin syllabus-ah telh a ni ang.

B-3.4(iv) Zirlaibu in a tum hrethiam tura zirtirna pek (Concept-clarity enhancement education):
Zirna innghahna bulthut (concept) hriatchianna leh tihnghet turin subject thenkhat – Philosophy, Logic leh test of reasoning, etc. dah a ni ang. Kan zirna te hi awmze thuk zawka kan hman theihna atan inter-disciplinary approach kan hmang dawn a ni.

B-3.4(v) Hna hmu thei tura zirna kalpui (Job-oriented education):
Tun dinhmun a Mizoram education mu tan lian ber chu kan zirna leh hna (Job) kal hrang daih hi a ni. Zirna in pangngai (conventional institutes) te hian hna min hmuhsak theilo tlat hi kan system hman lai that tawk loh vang a ni. Hemi siamtha turin kan zirna her rem tum a ni. Hna hmu ngei turin zirna leh kutthemthiamna lam (skills education) uar a ni ang.

B-3.4(vi) Zirna tha atana hmanraw tha pek (Infrastructure drive):
Zirna in changtlung zawk leh belhchian dawl zawk kan neih theih nan building tha, tui thianghlim, power supply tha, infiamna hmanrua, co-curricular activities tha zawk kan neih theih nan hma lak a ni ang. Sorkar zirna in te infrastructure a tih changtlunna turin MHRD normal scheme hrang hrang hman tangkai a ni ang.
Private institutions te pawh a theih anga nasa in Central Scheme heng – Infrastructural Development for Minority Institutes (IDMI) leh adangte hmangin tihhmasawn tum a ni ang. Kan thiamnate a taka chhawr tangkaina hmanrua atan Techno-Park (thiamthil leh mahni kutchhuak te internet kaltlanga hralh chhuahna) siam a ni ang.

B-3.4(vii) Thiamna bik nei tura in zirtir (Technical Educations endeavor):
India ram leh khawvel ram pum hi technical education lamah hian ke an pen nasat tawh avang leh hna reng reng pawh technical education kaltlanga hmuh theihna a tam tawh zawk avangin Mizoram pawh hian chu lamah chuan ke kan pen nasat a tul takzet ta a. Chutiang Institutes tha entirnan IIT, IIM, NIT, IIM, NIFT, ISI leh skills development Institutes te nei turin hma lak a ni ang.

B-3.4(viii) Pathian thu zirna lam tih hmasawn(Promotion of Theological Education):
State dang te’n an hlawhtlinpui em em Theological studies te uar zawka kalpui a ni ang. Pastoral leh church ministries chauhva hman thin piah lamah formal / professional education atan pawh nasa zawka hman dan ngaihtuah a ni ang.

B-3.4(ix)Zirna pangngai baka thiamthil zirna uar (Vocational Courses and Skills Development ):
Kan education tih hausak leh thar hlawk zawk theihna turin thlur (level) hrang hrangah Vocational Course tun aia uar zawka kalpui tum a ni ang. Chumi tihlawhtling tur chuan syllabus ennawnin a theih chinah chuan Central kalphung (norms) zawm tum a ni ang. Physical education, Hotel management, Pisciculture, Fisiculture, Horticulture, Embroidery and Tailoring, Cement Works, Carpentry, Pottery, Designings, music courses te pek tum a ni ang.
Tunlai khawvel mamawh skills development lam hawizawng a kan zirna in te her rem a ni ang. Chumi atan chuan ITI leh Polytechnics kan neih lai te tiphuisuiin trade chi hrang hrangah training uar leh zual a ni ang a, Community College pawh a remchan dan a zirin hawn tum a ni ang. Nursing School te student tam zawk zir theihna tura buatsaih a ni ang a, mimal leh pawl enkawl Nursing Institutes te pawh zirlai tam zawk luh theih nan buatsaih leh chhawmdawl an ni ang.
Tawng lam hmasawnna atan Hindi Education leh Foreign Language Education pawh mumal zawk leh tha zawka kalpui a ni ang. India ram pawna zir duh leh hnathawh tumte tan TOEFEL(Test of English as a Foreign Language) leh IELTS(International English Language Test System) training na ruahman sak tum a ni ang.

B-3.4(x) Zirna In endik leh an that dan tehna siam (Monitoring, Assessment & Accreditations of Institutes):
Tun dinhmuna kan zirna hmun neih that te leh neih belh tur – NIT, MZU, H&TE institutes, Horticulture University, NIELIT, ICFAI, RIPANS, ITI, Theological colleges, Medical College, Mizoram Engineering College, Polytechnics, Elementary & Secondary education te endiktu – Assessment and Accreditation Committee din a ni ang. Hei hi Mizoram Education Quality Control Board atan hman a ni ang.
Hei hian Mizoram chhunga sikul tam taka zirtirtu indaihlohna hi a zirchiang anga rualkhai taka zirtirtu semdarh hna a thawk ang. National schemes kan kalpui mekte uluk takin a vil reng ang. Zirlai rilru lama harsatna neite tan Students Councillor Institutes tinah dah a ni ang.

B-3.4(xi) E-Governance & E-Resources:
Kan zirna in te mumal zawk leh rual tlanga an kal theihna turin e-Governance hman tum a ni ang. Tin, zirna hmanrua tha zawk leh changtlung nei turin zirna in a library te tih changtlun leh internet facility / e-resources te dah tura hma lak a ni ang.

B-3.4(xii) Coaching Centre din (Establishment of Coaching Centres):
Professional Courses heng – MBBS, BDS, Engineering Courses, Computer Courses, Business studies, Architecture, Nursing Courses, etc. lama hmasawn turin Coaching Centres tha leh rintlak din a ni ang. Khua leh vengin an chhawr tangkai theih turin a remchan dan ang zelin ruahmanna leh a dinna hmun tur ngaihtuah a ni ang.

B-3.4(xiii) Zirna In sawikhawm leh tihchangtlun (Amalgamation and Promotion of Institutes):
Tun dinhmuna Sorkar zirna in te hi Students-Teachers Ratio in mil lo tak tak te an ni hlawm a. Khaw tin leh veng tinin mahni pual zirna in neih theuh kan duh avangin, hetiang hi a thleng fo thin a ni. He kan harsatna sukiang tur hian zirna in thenkhat te finkhawm (amalgamate) hi kan tum dawn a ni.
Mizoram College thenkhat hi Post Graduate College tura ruahmanna siam a ni ang. A tul dan a zira finkhawm leh technical training institute lama her rem dan pawh ngaihtuah a ni ang.

B-3.4(xiv) Zirlai thiamtheite lawman pek (Incentives for Meritorious Students):
Board leh University exam-a ti thate (Meritorious Students) hnenah Incentive Award pek an ni ang. Zirlai harsa leh thiam thei bikte chawikanna tur scholarship pek a ni ang. Hei hian ram danga an tih fo thin angin zirna tawp an thlen theihna tura puihna (assistance provision) a keng anga; hemi scheme atanga zir hlawhtling (Alumni) te hian naupang pakhat an chawm ve zel ang. Hemi atan hian inkaihhruaina dan mumal zawk (Rules leh Regulations) te siam a ni ang.
Mizo thalaite lehkhathiam zinga Competitive Exam beitute hnenah tanpuina pek an ni ang.

B-3.4(xv) Zirna tha leh changtlung din (Standardization Measures):
Zirna duhthusam (Academic excellence) kan neih theih nan kan zirnain chhuanvawr thenkhatah entawn tlak (Model) atan Smart Class-room te buatsaih tum a ni anga, zirlai te bung thar kaipui tum a ni ang.
Tin, zirlai rilru lam harsatna neite leh sual kawng dai mekte tan Zirna hmun tha a an neih thin angin Students’ Councillor pek an ni ang. Hei hian students tam tak harsatna a sukiang mai nilovin student thate pawhin hmasawnna an neih phah nasa em em dawn a ani. Ram changkang zawka an tih angin level hrang hrang hrangah Co-curricular activities – Choir competitions, Quiz, Sports, etc. nasa zawk leh Inter-School competitions changkang zawk buatsaih thin tura buatsaih a ni ang.

B-3.4(xvi) Zirtirtute training na hmun tih phuisui (Better equipped Faculty Training Institutes):
Tun dinhmunah Faculty training institutes kan neih te’n duhthusamin min chawm zo lo deuhin a lang a, he kan harsatna sutkianna atan Faculty Training Institutes changkang zawk leh tam zawk din belh tum a ni ang. Tlang dung hrang hrangte mamawh tur anga dinna hmun tur thlan a ni ang.

B-3.4(xvii) School kai hun ennawn (Revision of School timings):
Mizoram-a School kai hun (timing) tih hma hian mi tam tak tan harsatna a thlen a, chubakah naupang hriselna lam atan pawh nghawng tha lo a nei a a lan avangin ennawn tum a ni. School kai hun hi kan ram mipuite ei leh bar dapna leh hnathawh dan (culture) mila siam tum a ni.

B-3.4(xviii) Private Institutions te thawhpui leh chawikanna:
Mizorama zirna (education)-ah hian Private Institutions ten tha an thawh hlawk em em a, zirna in kan neih that zingah pawh Private Institutions te an thahnem hle a ni. Chuvang chuan kan zirna tichak tur leh tihmasawn turin heng Private Institutes te hi thawhpui tum a ni. Sorkar nen thawhdunna tha tak neih pui tum a ni a; a tul ang zelin Sorkar Programme leh hmalakna (initiatives) hrang hrang leh committee-ah te mawhphurhna pek tum an ni. Tin, central sorkar atanga hmathatna an hmuh theih te a tam thei ang ber hmu thei tura tan lak a ni anga, State sorkar pawhin a theih ang tawkin hma a la ang.

B-3.4(xix) Education a MNF Sorkar hmasa hmalakna chhunzawm:
MNF Sorkar hmasa hunlaia kan neih tawh – ‘The Mizoram Education Act’ (2003) hi ennawn a ni anga, a tul angin post thar heng Mizoram Education Service (MES) te pawh siam a ni ang. Tin, Rules te pawh ennawn a ni anga, zirna kaihhnawih thil hrang hranga tul leh hmalakna tur te ngaihtuah a ni ang.

B-3.4(xx)Zirlai te tana Hostel tam zawk sak:
Thingtlang atanga khawpuia lehkha zira kalte awmna turin Hostel tam zawk sak tum a ni.

B-3.4(xxi) Zirlai bul tanna ngaihpawimawh:
Kindergarten atanga Middle School thlengin, zirna lama a pawimawh lai ber a ni a. Heng Level-ah hian mithiam Psychologist leh Trained Teacher-te chauh hman kan tum ang.

B-3.5 SOCIAL SECURITY
(Vantlang nun nuam leh ralmuang siam)
Universal Declaration of Human Rights, Article 22-na chuan “Mitinte dikna chanvo chu lung muang taka nunho theihna hi a ni. Lung muang taka nung thei tur chuan, ei leh bar te, mimal leh chhungkaw zahawmna inhumhim sak thuah te, khawtlang ralmuanna thuah te sorkarin mimal tin te ‘dikna’ a humhal sak tur a ni” tih a chuang a.
Tin, International Labour Convention (1952) a thu passed tawh chu – “Khawtlang mipuite himna leh hlimna pe turin ei leh bar bakah khawtlang nun ralmuang a awm theihna tura hmalak hi sorkar mawh a ni” a lo ti bawk a. Chuvang chuan mi harsa leh chhawmdawl ngaite chhanchhuahna mumal tak neih a tul em em a ni. India Danpui Article 41-ah chuan, “Upate leh hnathawh tur nei lote, natna leh taksa theihlohna neite tan chhawmdawlna siam tur a ni” tih a chuang bawk a.
Heng Dan tlawhchhan leh ramin a mamawhna te hrechiangin MNF Party chuan Social Welfare Development Policies a lo duang chhuak ta a ni.

B-3.5(i) Chhawmdawl ngai te tana ruahmanna
(Relief, Rehabilitation and Welfare Schemes)
Kum upa te, hmeichhia te, leh naupang te leh pian phunga harsatna tawk (Person with Disabilities) ten sorkar puihna an mamawh bik em em a. Naupang rethei leh chanhai, hmeichhe rahbi tleu tawh leh hmeithai te bakah kutdawh ngaihsaktu mumal nei lo te tan Social Security scheme / Policy siamin hemi hmang hian enkawl leh an dinhmun te siam a ni ang. Khawlaia kutdawh an tlem theih na atan ruahmanna siam a ni ang.
Tin, he Policy hian chhiatrupna tuartu te chhawmdawlna tur scheme chi hrang hrang a keng a. Lirnghing, tuilian, kangmei, leimin, thlipui, accident leh tawrhna hrang hrang te an tawrh nasat dan a zirin “tanpui vat” theihna tur dan siam a ni ang.
Housing for All hnuaiah Mizoram chhunga khaw hrang hranga in nei lote in sak sak vek tum a ni a, RGGVY Scheme hnuaia mitin electric eng pek tum a ni.
B-3.5(ii) Khawtlanga sualna leh pawikhawihna tih tlem (Eradication of Social Evils and Rehabilitation)
Khawtlang a sualna chi hrang hrang – drugs leh zu hmankhawlohna in a hrin chhuah pawngsual, ruk ruk, naupang leh hmeichhe chunga hlei len, insualbuai leh nawhchizawrhna leh sualna chi hrang hrang te hi khawtlang nun tihrehawmtu te an ni. Heng sualna chi hrang hrang te hi tih tlem anih theih nan dan thar te siam leh dan dinglai te thuam tha a hmalak tum a ni. Hemi tihlawhtling thei turin tlawmngai pawl leh kohhran te nena tang hovin hmalak a ni ang a, hmalakna tur sum (Budget) pawh a tam thei ang bera tih pun tum a ni. Tin, zu hi khawtlanga harsatna leh buaina thlentu bulpui a nih avangin MNF party chuan sorkarna a chan hunah zu zawrh tihtawp a tum.

B-3.5(iii) Nundan tha leh mawi in zirtirna (Ethics and Moralism):
Kan khawtlang nunah tlawmngaihna te, taihmakna te, mi dang puih duhna te, a tlahniam hret hret a. Duhamna leh mahni hmasialna a zual zel a. Heng chhungril lama tlakchhiatna hian kan hnam nun a eichhe mek a.
Zonunmawi – tlawmngaihna, taihmakna, rinawmna, tuarchhelna, inngaihtlawmna, aia upa zahna, etc. kan pipu hun laia kan lo neih thin ten mual min liam san mek a. Heng kan hnam rohlu chan mek (lost pride) hi nei let leh turin hma lak a ni ang.

B-3.6 HEALTH-CARE (Mipui vantlang hriselna)
Mizoram mipuiten hriselna tha zawk kan neih theihna atan kawng thum hlawm lian tak – Invenna lam (Preventive) te, Tihdamna (Curative) bakah damdawi lam zirna tihchangtlunna (Promotive) lamah nasa zawka hmalak a ni ang.
B-3.6.1 Invenna lam (Preventive):
“Tihdam aiin Inven a tha zawk” tih thufing behchhanin natna hrang hrang laka mipuite kan him tlanna atan uar tak leh awmze nei takin zirtirna kalpui a ni ang a, a tul dan ang zela NGO, Kohhran leh khawtlng mipuite hmang tangkaiin inhrilhhriatna leh inzirtirna “Awareness” hrang hrang kalpui a ni ang. Tin, Sawrkar hmalakna heng MSACS, NCD, National Health Mission etc. te hmang hian nasa taka inzirtirna “Awareness” leh a taka tih nghal tur thil te inhrilh hriatna neih a ni ang.

B-3.6.2 Tihdamna (Curative):
Civil Hospital, District Hospital, CHC, PHC leh Health Sub-Centre te tih changtlun leh thuam that a ni ang. Thingtlang leh hmun kilkhawr zawka doctor indaihloh vanga harsatna awm thinte phuhru turin ruahmanna tha zawk siam ani ang. Aizawl leh district khawpui danga Civil Hospitalte tih changtlun a hmanraw changkang Zawk (Eg. CT Scan, MRI, etc.) te pawh dah belh tum a ni.
Health-care scheme tha leh chhenfakawm zawk ruahman a ni ang. Mirethei leh harsa te tan a thlawna inenkawlna (Free Medical Treatment) ruahman tum a ni. Hemi atan hian MNF sorkar laia duanchhuah Mizoram State Health Care Scheme leh Central sorkarin a kalpui mek Rastriya Swasthya Bhima Yojana (RSBY) leh a dangte changtlung zawk a kalpui a ni ang. Tin, sorkar hnathawk leh mipui te tan ‘Group Insurance Scheme’ hman tum a ni ang. Heng Health-care leh Health Insurance Programme atan hian Central Sorkar atanga tanpuina (assistance) awm thei zawng zawng te hmang tangkaiin Insurance Policy pawh a tha thei ang ber tura buatsaih a ni ang.
Tun dinhmuna damlo inenkawlna senso (MR Bill) hmuh let that theih loh leh MR Bill tang rei thin lutuk hi kaphung tha zawk siamim, inentirna leh damdawi senso awlsam zawka hmuh let theih tura ruahmanna siam a ni ang. Inenkawlna a lungawilohna thlenna theihna tur te, damdawi senso ang ang te hmuh let leh ngei ngei theihna tura thupetu (Medical Appellate and Grievances Redressal Board) siam a ni ang a, anni hian miharsate’n an inenkawlna senso chungchang leh vui leh vaina an neihte tha taka lo dawngsawngin, dik taka rorelin, damlo harsate rang takin an manganna an chinfel sak zung zung thin ang.

B-3.6.3 Damdawi lam zirna tihchangtlun (Promotive): Mizoram in Medical College changtlung tak kan neih theih na turin hma lak a ni ang a, natna khirhkhan thenkhat phai lam panpui ngai thin te Mizoram chhung ngeia enkawl a nih ve theih nan theihtawp chhuah a ni ang. Tin, Nursing leh Paramedical lam zirna uar zawk leh changtlung zawkin hawn belh a ni ang a, Mizo thalai tam zawkin he lam kawng an zir theihna atan hmalak a ni ang. Heng bakah hian natna khirhkhan bik entirnan HIV, Cardio vascular leh Cancer chungchang zirna (research) lamah nasa zawk hmalak tum a ni a, heng natna enkawlna tha zawk leh hmanraw tha zawkte ngaihtuah tum a ni.

B-3.7 SPECIAL ASSISTANCE AND INSURANCE :

B-3.7 (i) Thihna avanga rahbi tleute enkawlna:
Chhungkua a eizawngtu ber vanduaina tawka a boral palhin, a nupui fanaute chhawmdawlna pek an ni ang. Hei hi National Family Benefit Scheme bakah Labour Welfare Fund / Insurance Policy hmangin chutiang chhungkua chu chhawmdawl an ni ang. Hei hian eizawnna mumal ngaihtuah sak thlengin a huam ang.

B-3.7 (ii) Woman and Child Development (Hmeichhia te leh naupangte dinhmun tihhmasawn)
Hmeichhia, a bikin hmeithai leh naupangte hamthatna atan ‘Woman and Child Department’ din dan ngaihtuah a ni ang a, sorkar laipui a Woman and Child Ministry hnuaia scheme hmang tangkaiin hmeichhia leh naupangte himna leh hmasawnna tur nasa zawka ngaihtuah ani ang. He hmalakna kal tlang hian MHIP leh NGO dangte tihchakna leh thawhpuina dan a ngaihtuah ang.
B-3.7 (iii) Chhungkaw kehchhe tur venna:
Khawtlang tana mi hnawksak leh suah sual rawngbawl te zingah chhungkaw kehchhia (broken family) atanga chawr chhuak an tam ber tih kan hre theuh a. Hemi tih tlem hi sorkar tana chona (challenge) lian tak a tling a ni. Hetiang chhungkaw keh chhia kan tlem theihna tur hian sorkarin Policy tha tak a kalpui dawn a ni. Chutiang kawngah chuan Kohhran leh NGO te thawhpui a tum dawn a ni.

B-3.7 (iv) Taksa a harsatna nei (Person with disability) enkawlna:
Pianphunga rualbanlo / harsatna tawk te’n hamthatna an chan tur Dan in a sawi te an chan ngei ngei theihna turin, he Dan (PWD Act) tha tak awmsa hi anih tur dik taka kalpuiin, anmahni ngei tel vena tur thuneitu sang (Board) siam a ni ang.

B-3.7 (v) Kum upa zawkte enkawlna:
Kum upa te (tar kan tih mai te) tana hamthatna kawngah Dan (Senior Citizen Act) a nihna ang taka hmang tura hmalak a ni ang. State sum atangin Tar pension tihpun a ni ang a, Mizoram Upa Pawl nen a thawk hovin an rilrem zawng programme leh activities te siam a ni ang.

B-3.7 (vi) Ruihhlo ngai leh Ngawlveite enkawlna leh chhanchhuahna:
Mizorama chhungkaw tam zawk hi ruihhlo hian min tibuai a, a tihngaihna tak hre silo hian kan mangang em em a ni. MNF sorkar chuan khua / veng hrang hrangah khawtlang enkawl information centre din in, chumi kaltlang chuan Sorkar, kohhran leh NGO ten an din, anih dan tur dik taka enkawlna hmun (Rehabilitation and After-care Centre)-ah dah an ni thin ang. Hetiang enkawlna hmun (centre) atan hian sorkarin Dan mumal tak a siam ang a, thawktu, damdawi leh bungraw tunlai ber ber a thuamin tehfung (minimum standard) a siam ang. Hemi atan hian budget pawh a hranpa a dah ani ang.

B-3.7 (vii) Sorkar hnuaia awm Society te enkawlna:
Project leh Programme bik enkawl sorkar Society te heng – MSACS, ICPS, MSHCS, etc. a thawkte tha zawk leh chak zawka mipui rawng an bawl theih nan sorkara an dinhmun tihchian sak an ni anga, Employment Provident Fund leh Security te pawh mumal zawka kalpui an ni ang. Heng Society te hi hlawk zawk leh thahnem zawka chhawr tangkai tum a ni ang.

B-3.7 (viii) Journalist te hamthatna siam:
MNF sorkar laia bultan Mizoram budget-a Journalist Welfare Fund bakah hian Mizoram-a Accredited Journalist te hamthatna hrang hrang duan a ni ang a, Special Assistance, insurance leh retirement scheme te siam sak theih dan dap a ni ang. Tin, Mizoram chhung leh ram pawna Journalist te an zinin hamthatna (entitlement) mumal taka ruahman sak an ni ang. District tin leh khawpui lian deuh deuhah Press Club te tih changtlun leh hmanraw tha zawka thuam a ni ang.

B-3.8 SPORTS AND YOUTH SERVICES
Khawvel ram changkangte leh India ram State dangte angin keini Mizote pawh Sports lamah kan inhmang nasa ta hle a. International leh National level-ah pawh Zofate kan duailo ani tih vawi duailo kan lantir tawh a. Amaherawhchu, tun dinhmuna Infiamna ruhrel (Sports Infrastructure) kan neihte leh kan hlawhtlinna kan neihte hi a la beithamin hmasawn kan la ngai nasa em em a. Hetiang kawnga chona hmachhawn turin MNF Party chuan sports lama hmathlir fel tak a siam ang.
Sports hi mihringte, a tha zawnga kaihhruaitu, hnam hrang leh mimal inkara inkawmngeihna siamtu, ram hrang hrangte lungrual taka thawhho tir theitu, mihring hriselna leh ei leh bara intodelhna hmanraw pawimawh tak a nih avangin kan ngai pawimawh em em a ni. Hemi kawnga ruahmanna leh hmachhawp kan siamte kaihruaitu atan chuan khawvel pumpui ‘Infiamna’ lama thuneitu sang ber ‘International Olympic Committee’ (IOC) in infiammite kaihhruaina (Olympic Charter) a buatsaih zulzuia kalpui tur a ni. Tin, thalaite tana rahbi thar siam hi kan tum bulpui ber a ni. Infiamna tihhmasawnna (Promotion of Sports) atan a hnuaia mi ang hian hmalak a ni ang.

B-3.8(i) Sports Administration:
Sports hi International Olympic Committee (I.O.C) kalphungah Pawl Association (Non – Government Affairs)anga kalpui a ni a. Hemi ang hian Infiamna (Sports Administration) hi thuanghnih in kalpui tum a ni ang.
a) Sports in Non-Government Organisations (Voluntary Sports Associations)
b) Sports in Government Institutions.

Voluntary Sports Organisation te hi National Sports Federation a inthlunglut (affiliate) an nih avangin State Government duh dan ang ang a kaihhruai theih an ni lova. Mahse, a huikhawm zawngin MSSC hnuaiah State Level Recognised Association te hi thawhho pui a ni. An Annual programme leh Budget te pawh Mizoram sawrkar-in, MSSC kal tlangin a tanpui thin. Heng Associations leh Clubs hrang hrang te puihna hi tam zawk leh nasa zawk a kalpui a ni ang. Hemi atana pawimawh ber chu MSSC thuam that leh tihchak hi a ni. MSSC bakah District Sports Council, Zonal Sports Committee pawh thuamthat leh tichak an ni ang.

B-3.8(ii) Sorkar zirna ina Sport uar (Sports in Government Institutions):
Zirna In hniam ber atangin a bul thut a infiamna (Sports basic principle) inzirtir a ngai a. Sawrkar hnuaia zirna sikul leh Private Institution zawng zawngah pawh Sports & Physical Training te hi Compulsory subject-a siam a ni ang a, Infiamna ti thei lo tan Skill Development hrang hrang kalpui a ni ang.
B-3.8(iii) Olympic Dan (infiamna tobul leh tum) anga kalpui:
Olympic infiamna tobulleh tum pawimawh Fairplays, Sportsmanship, Friendship Solidarity, Olympic truce, environment, culture leh Internaltional Olympic Committee (IOC) dan pawimawh te, Mizoram Sports Association ten an vawn nun reng theih nan hmalak zel a ni ang. Heng infimna tobul te hi, hnam nun phung chawikanna atana hmanraw tangkai tak te an nih avangin nasa taka chawinun leh kalpui an ni ang.

B-3.8(iv) Sports kalpui dan tur (Two – pronged approach):
Infiamna hi huam zau zawng leh a sang zawng a kalpui tum a ni. Extensive approach hnuaiah hian a zau zawngin khawtin leh pawl tin te telve theih na tura hmalak a ni ang a. Intensive approach hnuaiah kalsang thei bik lote, nasa taka dawm kan tur leh sum pawh atul dan a zira seng turin hma lak a ni ang.

B-3.8(v) Mizo Infiamna (Traditional / Indeginous games) chawilar:
Mizo ten infiamna (Indigenous games) chi hrang hrang te tihlar leh chawisan tum a ni. Thingtlang lamah mi chak leh thei tak tak te tui mite dapchhuak turin Thingtlang mite in fiamna lehPi leh Pute hunlaia infiamna te uar tum a ni ang.

B-3.8(vi) Players Incentives & Facilities:
Infiamite an dam loh leh inhliam palh leh thihna thu ah tanpuina te, training hlana an chhungkua puihna te, hlawhtlinna an neih, chawimawina leh an career tur ngaihtuah sak tum a ni.
Infiammite’n level hrang hrang heng – International, World Championships, Asian Games & level, National a lawmman (Medal) an lakin chawimawina leh tangka fai lawmman tha tak leh chhenfakawm zawk pek an ni ang.

B-3.8(vii) Sports Infrastructure (Infiamna Ruangam Ruhrel lian tham ) :
Playground, Stadium leh Hall te, Hostel leh Training Academy te leh Infiamna kaihhnawih Instrument hrang hrang khawtin te tan an mamawh bikah ngaihtuah sak zel tum a ni ang. Tin, Stadium, Hall leh Playground leh Infrastructure dang reng rengte pawh, a enkawl dan (Maintenence and Management) fel taka ruahman a ni ang. Infrastructure siam zung zung theihna turin, Preservation of Spaces for Sports Infrastructure tih hi Sports Policy kipui pakhat ah neih ani ang.
Ram pum huapa infiamna Kutpui (National Games) te thleng thei turin ‘Infiamna Ruhrel tha nei tura hmalak’ (Infrastructure Drive) tum a ni. He Programme-ah hian tun maia thalaite tuihalna tireh turin hma lak a ni anga, chung zingah chuan Motor Sports lam hmasawnna turin Racing Infrastructure -National level ngaihtuah a ni ang. Cycling te hman theih tur Race Track pawh ngaihtuah sak an ni ang. Hemi chauh lo pawh a tam thei ang ber Sports ruhrel tha he Programme atan hian buatsaih tum a ni.

B-3.8(viii) Adventure Sports lam chawi lar (Promotion of Adventure Sports):
Eco-Tourism leh Adventure Sports te tihhmasawnna leh a tuite tan a remchanna siam sak turin Adventure Sports nasa taka kalpui tum a ni ang. Hei hian khualzinte pawh nasa taka a hip theih dawn avangin hmathar lak a ni ang. Tin, Olympic principle zul zui in sport Programme hrang hrang Conference, Camp, Exchange, Rally leh intawhkhawmna hrang hrangah Sports leh Cultural item te kalkawp tir dan ngaihtuah thin a ni ang.

B-3.8(ix) Discipline uar bik neih (Special emphasis on Specific Discipline):
Infiamna thenkhat, khawvel huapa kan lan awlsam theihna tur ni a kan ngaihte uluk taka zirchiang (research) in, kan thlang chhuak anga, hemi kawnga kan hlawhtlin ngei theih nan a bik taka sum ruahman leh kal phung funding leh system tha zawk hmanga tan lak a ni ang.

B-3.8(x) Asian Games, Common-wealth Games, Olympic Games & World Championships hmachhawn tura inbuatsaihna:
Heng Asia leh khawvel huap infiamna ah te hian Mizo thalai an tel theih na turin nasa zawka hma la in, hemi atan hian Sports Policy siamin Budget ah sum ruahmanna tam tham dah a ni ang.
Policy & Programme chungchanga
Chhinchhiah tur pawimawhte (End – Notes)
1. He lehkhabu (Policy & Programmes) hi kum 2012-2013 lai vela, Drafting Committee-in a lo duan tawh, ennawnna leh tihbelhna a ni ber.

2. Drafting Committee-ah hian member 16 awmin, vawi 22 aia tam in ko khawmin, a chhung thute hi phuah khawm a ni a. Pawn lam mithiamte pawh committee hian a rawn kual tam viau a ni.

3. A draft bu hi phuahkhawm fel a nih hnuah Elected Office Bearer-te, Core Committee-te Political Affairs Committee-te, Adviser leh General Secretary-te hmaah pharh leh sawiho a ni a. Sawihona atangin point thenkhatte pawh telh belh a ni.

4. Chumi hnuah a draft copy hi National Executive Committee-ah tahrik 23, Feb 2017 khan pharh leh sawiho a ni a. National Executive Committee chuan a pawm fel hnuah chhut chhuah a lo ni ta a ni.

5. He lehkhabu hi MNF Sorkar huna a hmalakna tur tlangpui leh a hawi lam tur tarlanna (Concept paper) a ni ber a. Heta tarlan loh MNF Sorkar huna a tihtur chipchiar zawk (Detail Programmes) tarlanna (Appendix Bu) a hranin ruahman sa vek a ni.

6. Heng Thuanghnih tarlan tak- (a) MNF Sorkar huna a hmalak dan tur tlangpui tarlanna (Concept paper) leh (b) MNF Sorkar huna a hmalakna tur chipchiar (Detail Programmes) Appendix Bu atangte hian Party Election Manifesto hi la siam chhuah a tlangzarh leh tur a ni ang.
7. MNF hmalakna tlangpui tur he lehkhabu-a tarlan bakah hian khawvel hmasawnna chak taka thang chho mekin a ken, heng thil ruahman a nih laia la awm silo te pawh uluk taka ngaihtuahna seng zui zel a, la telh belh zel tur a ni ang.

Chhiartu zawng zawngte’n ngaihtuahna uluk tak hmang zui turin leh hriatthiam loh lai kan nei a nih pawhin, in zawhfiah theih reng a ni e.